Hedenstedimi umiatsialiortartut ullumi akimasunit pulaarneqarput. Folketingimi siulittaasoq Henrik Dam Kristensen, Folketingimi ilaasortat Aki-Matilda Høegh-Dam, Siumut, aamma Daniel Toft Jakobsen umiatsialiorfik Poca Glasfiber ullumi ataasinngornermi pulaarpaat. Umiatsialiarisartagaat Kalaallit Nunaanni aalisartunit piniartuniillu atorneqarluartuupput.
Aki-Matilda Høegh-Dam umiatsialiorfimmut pulaarnissaq suliniutigaa. Pulaarnermini ilaatigut ima oqarpoq:
– Kalaaliusugut imaq aallaavigalugu inuuvugut, nalimmassartuarluta. Imaq pinngitsoorsinnaanngilarput. Imaq inuuneqalersitsisuuvoq, ataqqinngikkaangatsiguli qanigisatta inuuneranik naleqarsinnaasarluni. Imaq avaqqunneqarsinnaanngilaq ataqqineqartuassallunilu, Aki-Matilda Høegh-Dam pulaarnermini taama oqarpoq.
Kalaalerpassuit atugaannik umiatsialiortarnerat folketingimi ilaasortap qujassuteqarfigaa.
– Inuiaqatigiinnut sunniuteqarluarnissinnut qujanaq. Piffissami nutaanngoriartortuartumi namminiussuserput suli malugisinnaavarput. Qujanaq angalaarnissanut periarfissaqartikkatsigut, Aki-Matilda Høegh-Dam taama oqarpoq
Qaannap assinga mikisunngorlugu sanaluttartup sanaava Pocap piginnittuinut qujassutitut tunniunneqarpoq. Nunatsinni innuttaasut Poca ilisimalluarpaat, umiatsiaq Hedenstedimi ineriartortitaavoq. Suliffeqarfiup nittartagaa kalaallisut, danskisut tuluttullu ingerlavoq.
Folketingip siulittaasua Henrik Dam Kristensen pulaarnertik nuannaarutigaa:
-Kalaallit Nunaanniinnikuuvunga danskillu Pocamik umiatsialiaat takullugit, eqqarsaatigisimanngilarali inuiannut kalaallinut isumalissuussut. Danskit inuussutissarsiortut taamannak naalagaaffeqatigiinni attaveqaasiornerat misigalugu isumassarsisitsivoq, Folketingip siulittaasua pulaareernermi oqarpoq.