Ukiut tamaasa januaarimi februaarimilu Nunatta Kangiani anorlerajussisarpoq sikulu navianarsisimasarluni. Uteqqiasarporlu piniarnermik aalisarnermullu inuussutissarsiuteqartut akornanni inuussutissarsiorniarneq ajornakusoortorujussuanngortarmat. Qanimut suleqatigiilluta piffissap taamaalinerani allatut periarfissiissuteqarnissat aqqutissiuutsigu
All.: Lars Poulsen, Inatsisartunut ilaasortaq tassanilu Inuussutissarsiornermullu Ataatsimiititaliami ilaasortaq aamma Peter Davidsen, Sermersuummi kommunalbestyrelsimut ilaasortaq tassanilu Aalisarnermullu Ataatsimiititaliami ilaasortaq.
Ukiup imaalinerani uteqqiasarpoq Nunatta Kangiani piniartut akornanni inuussutissarsiorniarneq ajornakusoortorujussuanngortarmat. Ukioq nutaaq aallartikkaangat piniariartarfinni arlalinni sila pinngortitarlu atoruminaallutik pisarput.
Januaarimi februaarimilu anorlerajussisarpoq sikulu navianarsisimasarluni. Nunatta Kangiani inuussutissarsiornikkut unittoorluinnarsimasoqalersutut inissittoqartarpoq, tamannalu pingaartumik isorliunerusunut atuuttarpoq.
Tamanna pissutigalugu susassaqartut qanimut suleqatigiillutik iliuuseqartarnissaat kaammattuutigerusunnaqaaq, taamaasiornikkut inuussutissarsiornikkut aalisartut piniartullu isaatitsinerisa annikillineranni allatut periarfissiissutit ingerlanneqarsinnaammata. Soorlu naatsorsuuserinikkut assigisaanillu inuussutissarsiummut iluaqutaasinnaasunik pikkorissaanerit ingerlanneqarnerisigut.
Inuiaqatigiittut tamatsinnut iluaqutaassaaq, inuussutissarsiornikkut annaasaqaatigineqartussaagaluit minnerpaaffianiitsinniaatigalugit siunertalimmik inuussutissarsiutilimmullu iluaqutaasinnaasunik ingerlatsisoqarsinnaappat.
Siumumi isumaqarpugut tamanna kommunit Namminersorlutillu Oqartussat pisussaaffimmisut ataavartumik aaqqissuussaasumillu ingerlatassarigaat. Ineriartortitsinermut suliniutigineqarsinnaasunullu assigiinngitsunut aningaasat immikkoortinneqarsimasut kinguneqarluartumik atorluarneqarnissaat Siumumit kaammattuutigalugu susassaqartut; kattuffiit, peqatigiiffiit, kommuni qitiusumiillu oqartussat, eqaatsumik tamatuminnga suliaqarnissaanik kaammattorusuppavut.
Inuussutissarsiortut allat assigalugit piniartut aalisartullu aningaasartuutaat uninneq ajorput. Pinngortitallu pissusaa malillugu periarfissat piffissap ilaanni ajornarnerulertarnerat malillugu eqaatsumik periarfissiissuteqartarnissat ingerlanneqarnissaat kaammattuutitut apuukkusupparput.
Neriuppugut naatsorsuutigalugulu susassaqartut ataqatigiissaarinissartik siunissamilu taamatut aaqqissuussanik ataavartunngortitsinissartik soqutigissagaat, pineqartoq pillugu suleqatigiinnissarput kajumissaarutigaarput.