Aatsitassat “pinngoqqaatit qaqutigoortut” annermik nunani kisermaassilluni ingerlatsiffiusuni iluaqutiginiarneqarnerupput. Demokratiimik tunngaveqarluta ingerlatsisugut peqatitsinnut pisussaaffeqarpugut. Sinnguttutut pissusilersorunnaarluta akisussaaffimmik tigusinissarput pisariaqarpoq.
All.: Lars Poulsen, Inatsisartunut ilaasortaq
Nunatta nunami pisuussutaanut tamanut oqartussaanerput Namminersorneq pillugu Inatsisikkut naqissuserneqarpoq, taamaalilluta nunatta pisuussutaasa qanoq atorneqarnissaat pillugu tamakkiisumik oqartussaanerput qulakkeerneqarluni. Siumumut oqartussaaneq taanna aamma isumaqarpoq, sumiiffimmi inuit peqataatilluinnarlugit ingerlatsisoqassasoq.
Aatsitassarsiornerup nunatsinni aningaasaqarnitsinnut annertuumik sunniuteqarsinnaanera eqqumaffigaarput. Isumalluutitsinnut ilaasariaqarpoq nunatta pisuussutai uumaatsut ilanngullugit atorluartariaqarivut. Taannalu tutsuiginassappat iliuuseqarnerusariaqalerpugut.
Nunatsinni aatsitassanik piiaanerit atuinerillu nunatsinnut inuinullu aningaasarsiornikkut iluaqutaanerpaasunngorlugit ingerlanneqassapput. Tassungalu killissagutta aningaasaliissussanik atorfissaqartitsisugut tamatta nalunngilarput. Taamaattumik ilutigisaanik isiginnaartuinnartut inississanngikkutta, nunatsinni suliffeqarfiit aatsitassarsiornerup iluani ingerlatsiffiusut nunatsinneersunik peqataaffigineqarnerisa annertusarneqarnissaat qulakkeerneqartariaqarpoq.
Assersuutigalugu aatsitassat “pinngoqqaatit qaqutigoortut” annermik nunani kisermaassilluni ingerlatsiffiusuni iluaqutiginiarneqarnerupput, isumaqarpungalu uagut nunatut demokratiimik tunngaveqarluta ingerlatsiffiusumi peqatitsinnut pisussaaffeqartugut, nunatta tunniussinnaasai aamma taakkununnga iluaqutaalersissallugit. Isiginnaartuinnaanatami aamma iliuuseqaqataanissarput pisariaqarpoq.
Inuup peqqissusaanut, pinngortitamut avatangiisunullu akornutaanngitsumik pinngoqqaatit qaqutigoortut ilanngullugit iluaqutigilertariaqarpavut, piumaneqaqaammi. Uagullu nunatut tunniussaqarnissatsinnut akisussaaqataavugut. Nunarsuarmioqatitta uagullumi pisariaqartitagut qallortariaqalerpagut.
Sinnguttutut pissusilersorunnaarluta akisussaaffimmik tigusilluta aningaasarsiorfissagut atorlualerniartigit – sukarsuimmi sisamarivaat.