Kommunimi SIK peqatigalugu sulisartut pisinnaatitaaffeqarluarnersut takujuminaappoq, piiaaffigineqartarnertillu naammagiunnaarpaat.
All.: Malene Geisler Larsen, Kítsigsuarssúne Nunaqarfimmi aqutsisunut ilaasortaq, Siumut
Nunaqarfinni allaffissornikkut sulisut napparsimagunik timinik piaaffigineqartarnertik naammagiunnaarpaat. Sulerusussuseqaraluarlutilli inuttassarsiuinikkut immikkut nalilersorneqartuarnertik naammagiunnaarpaat. Naak Kommune sulisussaqarnikkut ataqatigiissaarinikkullu sulisartut immikkoortitaajuarneranik uliuuseqartussaq, kinaassusersiortarnerillu nunaqarfinni ersikkaluttuinnartunut illuatungiliisussaq. Kommune Qeqertalik siunissamut taamannak inukillisaanissamut ingerlanerluni?
Isumaqarpunga sulisartut pisinnaatitaaffikkut illersortuartariaqarivut illersortuassavakkalu. Kommune sulisoqarnikkut ersernerluttumik sulisunik kalerriisarnera paasititsisannginneralu aamma ataatsimiititsisannginnerit, sulisartunut pikkorissaasannginnerit aammattaaq sulisoqarnermikkut nalimmassaasannginneri sulisoqarnikkullu nipangersimasussaanerit atuutsinneqanngippallaarnerat annertuallaarput.
50/50
Tamatumuuna sulisartut illersorneqarnerusariaqarput akissarsiamikkullu qaffaaffigineqarnerusariaqarlutik. Ullumikkut inuuniarneq akisoqaaq aamma sulisartup pisariaqartippaa akissarsiatik nalimmassarneqartuaannarnissaat. Kinaluunniit suliffissarsiortoq, aalisartuuppat piniartuuppat, pisinnaatitaaffeqarnikkut sulisalerusuppat kommunip itigartiinnarsinnaanngilaa. Kommune pisussaaffeqarpoq inatsit 50/50 tunngavigalugu sulisinnaasoq akuerissallugu.
Aporfilersuisarnerit naammaqaat. Kalaaleq nunamini sulerusuttoq aporfilersorneqaannarsinnaanngilaq, inuk kinaluunniit sulerusussusilik anersaakkut pisinnaatilluni sulerusuppoq. Aalisarnermik piniarnermillu allagartaqarnissaq aamma saniatigooralugu aalisartut piniartullu ajornannginnerusumik nunaqarfinni piniarsinnaanerat ammaanneqartariaqarpoq.
Nammineq kajumissutsikkut sulisartut illersortarsimavakka sakkussaannillu ilisimasassaanillu aviteqatigalugit ullut 14-kkaarlugit naapittarsimavakka. Sulisartut suliassamikkut ilisimasassaannik aamma qanoq nunaqatigiittut ikioqatigiilluarsinnaanissarput pillugit.
Ilisimasaqarnissaq
Inulerisuuppat, silami sulisuuppat allaffimmiuuppalluunnit, nunaqarfimmi aqqutsisuuppalluunnit apeqqutaatinnagu. Naak kommunip nammineq iliuuseqarfigisinnaallugit innuttaassut qanoq sulisoqarnikkut periarfissarsiuussinnaagaluarai aqqutissiuussinnaallugillu. Kinaluunniimmi sulisartoq maleruagassat atuutsinneqartut nutaanngorsimappata sulisartup ilisimasussaavai suullu periarfissaanersut ilanngullugit.
Kommunip ilisimanngippagit periarfissat sakkussat najoqqutassat sulisartut nilliaataat taamarujuk inissisimasanngikkaluarput. Kommune aaqqissuussaanikkut nunaqarfinni suliassaminut atugassaraluaminut ajoraluartumik tunniussassaminik killilimmik apuussisarpoq. Kommunimi issiassut ilisimasaqarnerussagaluarput sulisartunut isummersinnaanissaminnut, tassami sulisartut nipangersarneqartuarnertik naammagileqqavaat.
Isumaqarpunga aamma SIK-mi ilaasortat nunaqarfikkuutaartunik akulikinnerusumik saqqummiussisartuusariaqartut.
Inuk kinaluunnit sulerusussusilik aporfilersornagu aamma qanoq ittuusussaa apeqqutaatinnagu atorfissaqarpoq. Nunatsinnut pingaaruteqarpoq tamatta assigiinngitsunik piginnaasaqarnerput atorluartariaqarmat. Sulisartut sulerusuttullu periarfissaqarnerulertariaqarput illersorneqarnikkut aamma pisinnaatitaaffeqarnerulernikkut.