Inuiaqatigiit kalaallit misiginneqatigaakka aamma Siumup tapersersussavaasi. Siumumi siulittaasutut aamma uanga akuersaarsinnaanngilluinnarpara, naalagaaffiup kalaallit arnartaannut iliuuserisarsimasaanut maannamut annerusumik iliuuseqartannginnerput. Inuiaqatigiittut inuiattullu taamak inissisimalluta peqqinnartumik tunngaveqarluta ingerlaqqissinnaanerput kiisalu aamma uanga inuttut tunngaviusumik apeqqusersortarpara, iliuuserineqartarsimasut amiilaarnangaarmata. Taarsiivigineqartussat taarsiivigineqassapput utoqqatserfigineqarlutillu. Allatut inerniliisoqarsinnaanngilaq.
All.: Erik Jensen, siulittaasoq
Inuiaqatigiinni tamatta tunngaviusumik ilisimavarput, nunatsinni inuiattut oqaluttuarisaanitta ilarujussua uatsinnut naalagaaffik kanngunartuliornerpassuarnik imaanaanngitsut aaliangiisarsimasoq.
Ullumikkut ilisimasatta ilamininngui tassaapput kalaaleqaterpassuagut pinngitsaalillugit nunaminniit nunaqarfinniit asasaminniit nutsertinneqartarsimasut, meeqqat misiliutitut atorlugit qallunaanngorsarniarlugit Danmarkimut nuutsinneqartarsimasut aamma minnerunngilluinnartumik kalaallit arnartai amerlasoorujussuit nalusaanik naartunaveersaaserneqartarsimasut, meeqqiunnginniassammata, kalaallit amerliartupiluunnginnerussammatagooq. Tupinnaqaaq!
Inuiaqatigiittut inuiattullu taamak inissisimalluta peqqinnartumik tunngaveqarluta ingerlaqqissinnaanerput kiisa uanga inuttut tunngaviusumik apeqqusersortalerpara, naalagaaffiup iliuuserisarsimasai imaannaanngingaarmata. Tunniutiinnarunnanngilagulli! Taamaammat isumaqarpunga massakkut qulaajaalluni suliat saniatigut, pinngitsoorata pineqartut tamaasa ullumikkumut kingunissalimmik iliuuseqarfigalugit Naalakkersuinikkut ersarissumik nakimaatsumillu suliniuteqalertariaqartugut. Naalagaaffik Danmark kiisalu ministerit kinguarsaassanngilluinnarput.
Inuttut Siumumilu siulittaasutut akuerisinnaanngilluinnarpakka, naalagaaffiup iliuuserisarsimasaanut maannamut annerusumik iliuuseqartannginnerput. Assersuutigilara ukiut 14-it matuma siorna meerartavut misilittaatigineqarsimasut pillugit qulaajaalluni sulisoqarnissaa eqqartorneqaraluarmat inuiattut iliuuseqanngitsoorsimavugut. Iliuuserineqarsimasut uppernarsarneqartussaanngillat, nalunngilavut piviusuusut – malitsigisaaniuna iliuusissat tamatta amigaatigigivut aamma pineqartuni tamani erseqqissumik susoqarpiarsimanera ilisimalertariaqaripput.
Taamaattumik inuiattut unneqqaserluffigineqarsimanerput kanngunartuliorfigineqarsimanerpullu tamakkiisumik ilisimalersimallutigu ingerlaqqinnissarput pisariaqartutut isigaara. Taannalu tikissagutsigu qulaajaanermik ingerlatsinissarput aammalu akisussaaffimmik tigusisoqarnissaa Siumup ilungersuutigissavaa. Ukiorpassuit atorlugit sulisoqarnissaa naatsorsuutiginngilara, kisianni pineqartunut erseqqissumik inerniliussaqarluta ingerlaqqinnissarput avaqqunneqarsinnaanngitsoq isumaqarpunga.
Aamma taarsiivigineqartussat taarsiivigineqassapput utoqqatserfigineqarlutillu. Allatut inerniliisoqarsinnaanngilaq.