Maanna ukioq 2022-mili Inatsisartuni sinniisutut ivertinneqarsimalerpunga, tupinnarporlu suleriaaserineqartussatut qinikkat namminneq akuersissutigisimasaat politikikkut siunnerfinnik aporfilersuisuummat. Taamaammat kissaatigivara suleriutsimut allannguutissat suunerinik, sunik allannguutissanik suliaqartoqarneranik suleriutsillu pitsanngortinnissaanik suliaqartoqarnersoq paasissallugu.
All.: Najaaraq Møller, Inatsisartunut ilaasortaq
Maannamut Inatsisartuni suleriuseq pulaffiginerugakku apeqqutinik eqqarsaatersoqaanga, sualuppoq massakkut siunnersuutinik sisamaasunik siunnersuusiorama, taakkunanilu ataasiinnaq upernaamut ataatsimiinnissamut akuerineqarluni.
Itigartitsisimanermut tunngavilersuutigineqartut aammalu Inatsisartoqarfimmi sulinerat apeqquserujussuarpara. Minnerunngitsumik Suleriaaseq Pillugu Ataatsimiititaliaq uani siornaakkunnili allannguutissatut suliarineqartut sumut killinneraat aammalu taakku suliarineqarnersut apeqquserusuppakka.
Piumasaqaatit annertuut
Inatsisartuni periaatsit ilusiliinissamullu piumasaqaatit qimerlooraanni Inatsisartunut piumasaqaatigineqartut annertoorujussuartut taasariaqarput. Inatsisartummi nammineerlutik suleriusissamik sinaakkusiisuummata allanngortissinnaanissaanut Inatsisartut tassaapput allannguisussat.
Tusartuaannartarpara Inatsisartoqatinnit suleriutsimik aporfilersorneqarlutik pisut. Tamanna Inatsisartunut aporaatitsivoq. Ajorpoq, aaqqittariaqarpoq.
Piumasaqaatit sakkortupput, tassami Inatsisartoq ilisimatuutut sulisussianngorlugu piumasaqaatit suliarineqarsimapput. Naluara qanoq isilluni tamanna taamak suliarineqarsimanersoq?
Qineqqusaaruteqartarpugut taakkulu soorunami naammasserusullugit sulivugut. Massakkullu suleriuserineqartumi Inatsisartoq aporfissalersorneqartussatut inissisimatinneqalersimavoq, allaat ilisimatusartutut ilisimatuutullu suliaqarnissaanik piumasaqaateqartoqarluni. Oqaaseqatigiinnguit aaqqinneqarsinnaasut allaat neqitaliullugit siunnersuutit itigartinneqartarlutik. Tamanna pissusissamisuunngilaq, Inatsisartullu aporaannissaat taava piulersinneqarpoq, soorlumi tassa Inatsisartoqarfik allaffittut politikertussianngorsimasoq, allaat Inatsisartunut naalakkatut inissinneqarlutik. Qanga Inatsisartunut ilaasortat allattoqarfiat qullersaanerulerami?
Naalakkersuisut aperineqassasut
Aammalu assersuutigalugu siunnersuusiornermi tamatigut § 37 aqqutigalugu (Naalakkersuisunut apeqqutit) piffissaagallartillugu akineqarsimanngippata, taava siunnersuutiginiagaq kivisiinnarneqartarpoq. Tassali siunnersuusiaqarniarnermi piumasaqaatit Inatsisartumut qaffasingaarmata. Politikikkununa siunnersuutigineqartup qanoq Inatsisartuni inerneqarnera tunngavigalugu, naggataatigut piviusunngortitsinialernermi (inatsisiliornermi) sunniutissaat aamma aningaasartassaat inississorneqartussaassut. Kisianni tamakku ilaatigut tunngavilersuutigalugit uagut Inatsisartutut suut politikikkut oqaluuserisinnaanerivut pillugit immitsinnut killilersuutissatsinnik suleriaasiliortoqarsimavoq.
Taamaammat apeqqutissaqarpunga. Suleriaaseq Pillugu Ataatsimiititaliap siornaak Hotel Hans Egedemi isumasioqatigiissitsinerani suliat sumut killippat? Suliarineqarpat? Suut allannguutissat suliarivaat?
Politikerit sammivilersuisussaapput
Inatsisartut oqallittussaapput Inatsisartullu allattoqarfiata qanoq isikkoqarnissaat periusissiallu piumasarineqartut misissortussaavaat naammassiniartussaallugillu. Qulakkeerlugit oqaluuserisassanngortinneqarnissaat Inatsisartumullu siunnersuuteqartumut ingerlateqqillugit.
Apeqqusernartorujussuuvoq Inatsisartut allattoqarfiat qanga oqartussaaninngortinneqarsimanersoq? Sooq Inatsisartut apeqqutini siunnersuutigineqartuni politikikkut oqaloqatigiinnissat apeqqusersorneqarpaluttarpa? Sooq siunnersuusiunngillat qanoq pitsaasumik allanngortissinnaasut, Inatsisartut apeqqutini politikikkut sammivilersuilerniassammata? Sooq imminnut pisussaaffilinngillat siunnersuutiginiarneqartut siuarsarnissaanut pisussaaffeqarnerminnik?
Siunertat ersernerlussisarput
Qinikkatut suleriutsimut appakaalluni, suleriuseq allaat nukillaartitsiniaasutullusooq misinnartoq peqqinnanngilluinnarpoq. Paasisinnaaqaakka aamma qinikkat suliarerusutatik iseraangamik naammassisaqarusukkaluarlutik aporfissalersorneqartarsimallutik nukillaaginnartarsimappata.
Taamaattoqartarpormi. Taamaammat kissaatigivara suleriutsimut allannguutissat suunerinik, sunik allannguutissanik suliaqartoqarneranik suleriutsillu pitsanngortinnissaanik suliaqartoqarnersoq paasissallugit.