All.: Lars Poulsen, Inatsisartunut ilaasortaq, Siumut
Siumit tunngaviusumik anguniakkatsinnut ilaareersoq imminut pilersorneq pisoq aallaavigalugu nukittorsarneqartariaqarpoq, inuiaqatigiit nunarsuarmi akit qaffakkiartorneranut akiuussinnaalersinneqassappata, tamannalu pillugu pisassiissutit nalimmassarneqarnissaat inissaminiissaaq.
Nunarsuarmi akit qaffakkiartornerat nunatsinni aamma nioqqutissat akiisigut malugiligarput innuttaasunit nukissaqarfigineqarluni piareersimaffigineqarsinnaasariaqarpoq, tamannalu innuttaasunut aamma piniarnikkut aalisarnikkullu inuussutissarsiuteqartunut malunniuteqartumik pitsaanerusumik sinaakkusiinikkut tunniunneqarsinnaavoq. Akiuussinnaassuseq innuttaasunit pilersinneqarsinnaasariaqarpoq akitigut artukkigaalluta ipisitaassanngikkutta.
Nunarsuarmioqataasutut nalimmarsarsinnaanerup ilutigisaanik nunatsinni innuttaasut imminnut pilersornerat nukittorsarneqassappat akissaataasigut nalimmassaaneq avaqqunneqarsinnaanngitsoq Siumumit isumaqarpugut.
Naak inoqarfippassuarni allaffissornikkut aningaasarsiaqarnerit ingerlanneqaraluartut puigorneqassanngilaq sineriak inoqarfiillu annertuumik piffiusut piniarnikkut aalisarnikkullu inuussutissarsiorfiummata.
Siumumit tunngaviusumik anguniakkatsinnut ilaareersoq tassa imminut pilersornerup nunami nukittorsarneqarnerunissaa aallaavigalugu eqqaarusuppara ullumikkut piniagassat killilersungaatsialersimasagut pisut tunngavigalugit inuup imminut pilersornerulernissaa anguniarlugu nalimmassaavigineqarnissaata pisariaqarnera avaqqukkuminaammat.
Tamanna tunngavigalugu oqaatigerusuppara nammineq pilersornerup nakussassarneqarnissaanut pisassat killilersugaasut qaffattariaqarnerisa pisariaqassusaa allaqqunneqarsinnaanngitsoq, soorlu nannuttassat, qilalugartassiissutit, aarrit il.il.