Nappaammik eqqugaallutik sulisinnaajunnaartut qanoq pisinnaatitaaffeqarnersut kiap illersussavaa? Systemip? Inatsisit? Inunnik isumaginninnermut inatsisit aporfiusartut aaqqinneqarnissaat pillugu piaarnerpaamik suleqatigiissitamik pilersitsisariaqarpugut. Kommunit ulluinnarni inunnik isumaginninnermi sullissisut, inatsisinillu atuutsitsisut suleqatigiillutik inatsisit aaqqiiffigisariaqartut, inuit eqqugaasartut pillugit aaqqinneqarnissaat, sulissutigisariaqarpaat – Systemi pinnagu inuit pillugit inatsiseqassaagut
All.: Peter Davidsen, Sermersuummi kommunalbestyrelsimut ilaasortaq, Siumut
Tamatta ilisimagunarparput inuit taamatut eqqugaasut annertuumik sorsuuteqartartut, tassami ullormiit ullormut inooriaaseq allanngorluinnartarpoq. Sulisinnaajunnaarnerup kingunerisaanik ilaqutariittut atugassarititaasut allanngoriataartarput aningaasaqarnikkut, ilaqutariittut inooriaatsikkut minnerunngitsumillu tarnikkut, timikkut eqqarsartaatsikkullu atugassarititaasut eqqugaasumut ilaqutaannullu ”nappaammik eqqugaanikkut – tupatsitaanerup kingunerisaanik” ingerlariaqqinnissami unammilligassat imaannaanngitsuusut ilisimavarput.
Taamatut eqqugaasimasunik oqaloqateqarninni paasivara eqqugaasumut ilaqutaasunullu unammilligassat imaannaanngitsuusut, ilaqutariittut inuunerup allanngoriataarneranut tulluarsarniarnermut, timikkut tarnikkut eqqarsartaatsikkullu inissinniarnermi nukippassuit ”eqqarsaaterpassuillu” atornerisa saniatigut pisortaniit pitsaanerusumik ikiorserneqarnissaminnik ujartuillutik aamma sorsuuteqartariaqartarlutik ”nukippassuit” atortariaqartarpaat, kiisalu inatsisitigut aporfissat pisortanut paasiniaallutik sorsuutigisariaqartarsimavaat.
Assersuutigalugu ilaatigut pisortaniit oqariartuutit ima ittut tusartarsimavaat: ”Uit/nuliat suliffeqarmat ikiorsinnaanngilatsigit / inatsisit tunngavigalugit annerusumik ikiorsinnaanngilatsigit.” Tupiginngilara eqqugaasut oqaatsinik taamaattunik tusarlutik pakatsisarmata nukillaajallallutillu aamma systemimut sorsuttariaqalerlutik misigisarnerat, naak nappaammik eqqugaanerup kingorna ingerlariaqqinnissamut nalimmassarniaraluarlutik nukiit systemimut atortariaqalernerinik misigititaaneq marloriaammik artukkerneqarneruvoq.
Taamatut nappaammik eqqugaallutik sulisinnaajunnaartut qanoq pisinnaatitaaffeqarnersut kiap illersussavaa? Systemip? Inatsisit? Uani inuit pineqartut pisinnaatitaaffeqartariaqarput inatsisitigut illersorneqarnissaminut aamma ilaqutaasut pisortat sinnerlugit qaavatigut nammattussanngunngikkaluarlugit, pisortat (system) eqqugaasunut ikiorsiinissaminut siunnersuinissaminullu pikkorinnerusariaqarput, inuillu pineqartut pisinnaatitaaffiinik illersuinerusariaqarput.
Tassami kommune tunngaviusumik pisussaavoq inuit kikkulluunniit ikiortariaqalersimasut pitsaanerpaamik ikiorserneqarnissaat anguniassallugu aamma siunnersuissalluni inatsisit tunngavigalugit. Tassungalu tunngatillugu pineqartunut kommune pitsaanerusumik inatsisinik tunngavilimmik ikiorsiisinnaanngikkuni pisussaavoq inunnik isumaginninnermi sullissinermi inatsisitigut aporfissat aaqqittariaqartut Inunnik Isumaginninnermut Naalakkersuisumut ingerlateqqissallugit. Inatsisartut inatsit allanngortissinnaammatigit.
Piffissanngorsoraara kommunit Namminersorlutik Oqartussallu inunnik isumaginninnermut inatsisit aporfiusartut aaqqinneqarnissaat pillugu piaarnerpaamik suleqatigiissitamik pilersitsisariaqartut. Kommunit ulluinnarni inunnik isumaginninnermi sullissisut (inatsisinik atuisut) inatsisinillu atuutsitsisut suleqatigiillutik inatsisit aaqqiiffigisariaqartut inuit eqqugaasartut pillugit aaqqinneqarnissaat sulissutigisariaqarpaat – Systemi pinnagu inuit pillugit inatsiseqassaagut.