Nato-p Inatsisartuisa Luxembourgimi ataatsimiinneranni Folketingimi ilaasortaq Aki-Matilda Høegh-Dam ataatsimeeqataavoq tallimanngornermi maajip 19-ianit maajip 22-at ilanngullugu.
Aki-Matilda Høegh-Dam kalaallini siullersaalluni Nato-p Inatsisartuini toqqaannartumik ilaasortaavoq. Ataatsimiinnerni peqataanermini (NPA-mi) ataatsimiinnerit Ukrainemi sorsuttoqarneranut, Europami illersornissamut ataqatigiissarneqarnera kiisalu Nato-p ataatsimeersuarnissaanut Litauenimi pisussamut tunnganerupput.
Nato-p inatsisartuisa ataatsimiinneranni ataatsimeeqataavortaaq, ataatsimeersuartoqarneranilu aamma peqataalluni.
Nato-p ataatsimeersuarnera pitsaasumik avitseqateqarluarsinnaanertut periarfissaq isigaa, tassani Kalaallit Nunaata soqutigisai, isummanik avitseqatigiiffiusutut kiisalu isummersorfittut aamma ataatsimeersuarneq isigalugu.
”Ataatsimeersuarnermi oqallinneq peqataaffigalugu soqutiginaqaaq. Isummanik avitseqatigiiffiusutut ataatsimiinneq isigaara. Inatsisinik periutsinilluunniit nutaanik pilersitsiffiusutut isiginngilara. Inatsisit periutsilluunniit nutaat nunamit aggerfimmit inatsisartoqarnikkut suliassaapput”, oqarpoq.
Nunatsinni Inatsisartuni ilaasortat Nato-p inatsisartuini ilaasortaasinnaanngimmata Danmarkimi naalakkersuisooqatigiilernissamut isumaqatiginninniartoqarnerani Aki-Matilda Høegh-Dam piumasaqarnikuuvoq Nato-p inatsisartuini ilaasortaassalluni.
”Kalaallit Nunaat Naalagaaffinngorpat Nunatsinni Inatsisartut Nato-p inatsisartuinut ilaasortaalersinnaanissaat ilimanarluinnarpoq. Nunatsinni Inatsisartunut ilaasortat siunissami Nato-p Inatsisartuinut ataatsimeeqataasalernissaannut piareersaaqataallunga ataatsimeeqataaninnut ilaatigut tunngaveqarpoq”, Aki-Matilda Høegh-Dam oqarpoq.
Ataatsimeeqataanerminut atatillugu imaqarniliussaaq, tassani paasisani ilisimalikkanilu saqqummiutissallugit. Misilittagarilikkani Inatsisartunut ilaasortanit siunissami atorluarneqarnissaat neriuutigaa.
Ataatsimeersuarnermi Nato-p inatsisartuinut ilaasortat 274-it ataatsimeeqataapput. Nunat 31-t Nato-mut ilaasortaapput.
Paasissutissat
Nato-p inatsisartuini ilaasortat Danmarkimeersut ataatsimeeqataagaangamik ataatsimiinnerni eqqartortarpaat illersornissamut tunngasut. Nato-p inatsisartuini ilaasortat NATO-mut attuumassuteqanngillat, Nato-mili nunat ilaasortaatitaasa inatsisartuisa ataatsimiittarfigaat. Taamaasilluni NATO-mi nunat ilaasortat akornanni inatsisartutigut ilaasortat una ataatsimiiffik ataqatigiiffittut isiginerusarlugu.
Nato-p inatsisartui pillugit paasissutissat amerlanerusut uani takukkit: Home | NATO PA (nato-pa.int)