Ulluni makkunani oqallittoqaannarani oqallinneq kamalik atorneqarpoq. Nipi saammaassiffiusinnaanngitsutut nipeqarsinnaavoq, oqallinnermilu ilanngussiniarluni oqaaseqarnissaq ajornarsinnaavoq. Taamaattumik amerlasuut allat ”akiuunnermut” ilanngunnissaanut utaqqimaartarput pineqartoq illersorumallugu like-rinikkut imaluunniit kommentariliinnikkut.
All.: Inga Dora G. Markussen, aaqqissuussaanermi siulittaasup tullia, Siumut aamma KNR-imi kiisalu Mediehuset Sermitsiaq.AG-imi siulersuisuni ilaasortaanikoq
Atuartartut allagaani uani sumut ingerlanersunga paasiviuk? Aap, immaqa eqqoriareerpat facebooki kommentariliiffissallu eqqartorikka. Piffik katersuuffipput – ineeraq akisuaffiusoq imaluunniit aggualulluta eqqimattakkaarfipput. Piffik immitsinnut nersualaarfipput tapersersoqatigiiffippullu, kisianni aamma immitsinnut naveersiffipput pimmatigiffippullu. Ullut ilaanni facebook app ammarnera peqqissimissutigisarparput ullulli ilaanni nuannaarutigalugu.Kammalaatit soorunami apeqqutaapput, kisianni aamma ulloq taanna nipi atorneqartoq.
Ukiorpassuit matuma siorna tusagassiorneq qimakkakkuli maqaasisama ilagaat inuiaqatima ineriartorneq pillugu eqqarsaataat tusassallugu. Sumut ingerlanersugut. Pisut ingerlarngi misissoqqissaarnerat. Pissutsit inissisimaffii. Iluarunaq inuit eqimattakkaat itisilerlugu pulaffigissallugit, ilisimasaliunngitsut, kisianni inuit inuiaqatigiinni pisut soorlu pinersut oqaloqatigiissillugit. Piffik katersuuffigisinnaasarput inuit piffissami ilanngussorfigineqartut eqqartoraat tusarnaarlugit. Piffik taanna sumiippa?
Piffik taanna – eqqarsaatigisara – tassaavoq KNR Radiu aamma TV.
Oqallittarfittut aallakaatitassiaq eqqartorpara. Qineqqusaarfittut aallakaatitassiaanngitsoq, kisianni isumassarsiaq aallakaatitsivimmi inunnik piffissaqarfiginninneq, oqaloqatigiinnermik aqutsisulerluni. Isumassarsiaq nassaarsiaasoq nassuiaatitaqartariaqanngitsoq. Sooruna oqalliffiusunik aallakaatitassiaqanngitsoq?
Isertugaataassanngilaq uanga nammineerlunga KNR-ip siulersuisuini issianikuunera, tassanilu arlaleriarlunga aallakaatitassiamik uagutsinnik katersuisumik peqartariaqaraluarnera ujartortaraluarpara. Radiu ullaakkut aallakaatinneqartartoq ingerlaartoq minutsillu sisamakkaarlugu arfineq pingasukkaarlugillu nipilersukkanik aallakaatitsisartoq eqqartunngilara. Aallakaatitassiaq itisiliisoq, sammisamik ukkatarinnittoq takisuunillu apersuinernik imalik eqqartunngilara.
Maani nunami innuttaasutut maqaasisara tassaavoq sapiissuseq. Isumassarsiaq sapiitsuusoq, immitsinnut oqaluunnissatsinnik aqqutissiuisoq aamma isumaqatigiinngissinnaanermik ilinniartitsisoq aammalu immitsinnut inissaqartissinnaanitsinnik. Oqaluunnikkut isummatsinnik eqqarsaatitsinnillu itisiliisinnaanerput taamatullu aamma inuiaqatigiiffigisarput paasisinnaagipput. Ineriartorneq pillugu aamma sumut ingerlanersugut aamma sooq.
Nalunngilara isumalluutinik amigaateqartoqartoq aammalu tusagassiortunik, innuttaasut katersorlugit oqaloqatigiinnissaanik akisussaaffimmik tigusinissaminnik pisinnaasunik sapinngitsunillu atorfinitsitsinissaq ajornakusoortoq. Soorunami tamanna pillugu iliuuseqartoqartariaqarpoq suliffimmi aningaasarsiallu tungaatigut atugassarititat pitsanngorsarnissaat qulakkeerniarlugu. Aallakaatittakkat pingaarnersiorneqartariaqarput innuttaasunillu kiffartuussinissaq pillugu isumaqatigiissut ullumikkut atuuttoq peqqutaalluni allanngortikkuminaappoq, taanna KNR-ip malitassarimmagu. Kisianni eqqaamanerlunngikkukku oqallinneq allallu pillugit allassimasoqarpoq taamaammat ajornarsimassanngilaq.
Inuttut nammineq uummaarissarneqarnissaq kissaatigigaluarpara, paasisimasanik immersorneqarneq aamma taamaasiornikkut uanga avatangiisinni susoqarneranik paasinninneruneq. Tamannalu KNR-i nunatsinni piorsarsimassutsikkut suliffeqarfinni pingaarnersatut, uanga isumaga malillugu, suliassaq tamanna pimoorunnerullugu ingerlatassaralua.
Aggualunnerit taassumap katersortussaanngippagit, taava inuiaqatigiiffigisatsinni susoqarneranik misissueqqissaarneq kikkunnut tamanut inuit naapittarfiiniittunut tunniunneqassaaq, tamannalu pitsaanerpaanngilaq.
Tamatuma nalaani inatsisiliortut tamat oqartussaanerata ineriartorneranik ikorfartuisumik tusagassiuuteqarneq pillugu politikkeqarnerup sinaakkutai misissortariaqarpaat, tassani aamma KNR-ip naalagaaffiup pissaanerata sisamaattut, innuttaasunik paarsisutut inissisimarata piviusunngorsinnaanera ilanngullugu.
Tusagassiuuteqarneq pillugu politikkip aamma sumiiffinni radiu aamma TV-qarneq, allattariarsornikkullu tusagassiortut atugarisaasa sinaakkutaat misissortariaqarpaat.
Taamatut qatimaalaarlunga KNR-i sulilluarnissaanik kissaappara.
Una isummersuut AG-mi ulloq 24.05.2023 naqinneqarpoq.