Inatsisartut Suleriaasianni § 37 imm. 1 naapertorlugu Naalakkersuisunut apeqqut imaattoq matumuuna saqqummiuppara.
Naalakkersuisunut apeqqut:
- Kulturikkut illorsuarmik nipilersornermillu ilinniarfimmik Aasianni pilersitsinissamik Naalakkersuisut pilersaaruteqarpat?
- Illoqarfimmik/nnik allami/nik aamma kulturikkut illorsuarmik nipilersornermillu ilinniarfimmik pilersitsiviusinnaasumik/nik Naalakkersuisut piukkussaqarpat?
- Kommunit allat tamarmik Campus-eqalissapput Aasianni nipilersornermik ilinniarfik pilersinneqarpat, Avannaata Kommunia minillugu. Suna tunngaviua Avannaata Kommuniata kisimi Campus-eqartinnginnissaanik Naalakkersuisut isummernerannut?
- Qaqortumi meeqqerivimmik Naalakkersuisut Kommuni Kujalleq peqatigalugu pilersitsiniarpat?
(Doris Jakobsen Jensen, Inatsisartunut ilaasortaq, Siumut)
Tunngavilersuut:
Sermitsiaq nr. 17 2021-mi atuarneqarsinnaavoq Ilinniartitaanermut Kultooreqarnermut Timersornermut Ilageeqarnermullu Naalakkersuisoq ima oqariartuuteqartoq: ”Aasiaat anginerulersillugulu inerisaaffigissavarput”.
Sermitsiami saqqummersumi Naalakkersuisortaap illoqarfinnik allanik taasaqanngilaq imatut paasinarluni Aasiaat kisimi inerisaaffigineqarniartoq. Aammattaaq ersarissumik oqaatigineqarpoq Ilulissat GUX-eqalernissaa isumaqatiginagu.
Kommune Kujataa Campusseqarpoq, Kommuneqarfik Sermersooq Campus-eqarpoq, Qeqqata Kommunia Campus-eqarpoq, Qeqertallip Kommunia Campus-eqalissaaq Naalakkersuisup oqariartuutini piviusunngortissappagu kisianni Avannaata Kommuniani Campus-eqalernissaq ornigineqanngilaq naak GUX Aasiannut ajoqutaanngitsumik sammivilerneqarsinnaagaluartoq.
Apeqqummut kingullermut tunngatillugu, Kommuni kujalliup borgmesteriata tusagassiuutini oqaatiginikuuvaa Qaqortumi meeqqanik utaqqisoqarpallaaqimmat meeqqeriviliornernut Namminersorlutik Oqartussat ikiuuttariaqartut.
Apeqquteqaatima ullut suliffiusut quilit iluanni akineqarnissaat piumasaraara.