… Borgmesteriunerli peqqutigiinnarlugu utaqqisut qaangiinnarnerat pissusissamisuunngilaq
All.: Inga DĂłra G. Markussen, Kommunalbestyrelsemi ilaasortaq
Ippassaq unnukkut Kommuneqarfik Sermersuumi borgmesteri facebookimini utoqqatserpoq, sisamanngornermi juulip 22-ani utaqqisut untritilikkaat allat qaangiinnarlugit atorfilittat ilaat peqatiginerat peqqutigalugu Covid-19-imut akiuussutissamik kapitikkami. Ullormi tassani sialleqalunilu anorleqaaq, innuttaasorpassuillu akiuussuserneqarnissaminnut utaqqilussinnarput. Innuttaasorpassuit ilaat akunnerpassuarni utaqqisut ajortiasuupput, ilaatigut naartusut utoqqaallu.
Kukkusimanerup nassuerutiginera iluarinarpoq ilinniarfiullunilu. Taamaaliornissatsinnut tamatta pikkorinnerusinnaasariaqarpugut. Taamaattumik taamatut pisoqaraangat ”likertarpara”. Maannali KNR-imi nutaarsiassatigut paasivarput, kommunimi atorfilittat ”akiuussutissamik kapitinnissamut salliuniarsimasut” ilaatigut akiuussusersuinerup ingerlannissaanni ikiuukkumannginnermik sioorasaarinikkut.
Nutaarsiassani allassimavoq allaat sulisut ilaat atorfilittanit sioorasaarneqartutut misigisimasoq. Eqqortuusinnaanngilaq kommunimi sulisut innuttaasunit allanit salliutinneqartutut misiginissaat. Matumani borgmesterip innuttaasut oqaluttuuttariaqarpai tamanna qanoq aaqqinniarnerlugu, Siumumilu piumasariniarparput pisimasup iternga tikillugu misissuiffigineqarnissaa. Imaalertariaqanngilarmi allaffissornermi A-nik B-nillu sulisoqassasoq.
Eqqaamasariaqarparput borgmesteri kommunimi siuttuunissaminut kommunalbestyrelsenimit piginnaatinneqartoq. Atuuffiuvoq pingaartupilussuaq. Borgmesteriussagaanni pitsaasumik naliliisinnaassuseqartariaqarpoq, naatsorsuutigineqarporlu allanik maligassiuissasoq. Borgmesteri utoqqatsernerminut ”likerneqarpoq”, allanilli siulliulluni kapitissinnaanerata takutippaa ajoraluartumik naliliisinnaanera pitsaanngitsuusoq. Matumani mianersoqqussut ikittaarsimasussaagaluarpoq; Salliuniarpunga pissutigalugu…..
Pisimasoq soorunami uissuumminarpoq, immikkoortitsisoqarpormi. Pissaanermik atornerluinerunersoq imaluunniit allaanersoq pingaarnerunngilaq. Inuit ilaat misigisimapput immikkut pineqartariaqarlutik aalajangersimasumi suliffeqarnertik ”peqqutigiinnarlugu”. Taamatut pisoqartussaanngilaq. Tamatta inatsisinut naligiippugut. Nakorsatut sulisut nalilertussaavaat salliusoqassanersoq, matumanilu salliusussaq borgmesteriusussaanngilaq, attorfilittaanngilluinnarlunilu.