Inatsisartut suleriaasianni § 37 imm. 1 naapertorlugu Naalakkersuisunut apeqqut imaattoq matumuuna saqqummiuppara:
Naalakkersuisunut apeqqut:
1. Namminersorlutik Oqartussat Kommuneqarfik Sermersuullu inissiat attartortittakkat pillugit aaqqiagiinngissuteqarnerannut suliaq sumut killippa?
2. Misissuineq suli ingerlasimappat Naalakkersuisuniit unitsinneqarniarpa imaluunniit ingerlatiinnarneqarniarpa?
3. Naalakkersuisut isumaqarpat Namminersorlutik Oqartussat Kommuneqarfik Sermersuup inissianik attartortitsineranut suliamut akulerunnissaminnut inatsisitigut tunngavissaqartut?
4. Naalakkersuisoq sorleq suliaq taannapiaq pillugu akisussaasutut ingerlatsisorineqarpa?
(Inatsisartunut ilaasortaq Doris J. Jensen, Siumut)
Tunngavilersuut:
Ilisimaneqartutuut Namminersorlutik Oqartussat aammalu Kommuneqarfik Sermersuup akunneranni inissiat attartortittakkat pillugit aaqqiagiinngissuteqartoqarpoq. Suliarli piffissami sivitsulersumi paasisaqarfiginnginnatsigu killiffik pillugu apeqquteqaateqarpunga. Taamatuttaaq aamma paaserusunnarmat Naalakkersuisoq kina/sorleq una suliaq pillugu ingerlatsiumaarnersoq.