Aalisarneq

Siumup anguniarpaa aalisarneq piujuartitsineq tunngavigalugu ineriartortinneqassasoq, inuiaqatigiinnut tamanut iluaqutaasussamik. Inuussutissarsiut ineriartortinneqassaaq aamma inuusuttut pitsaanerusumik periarfissinneqassapput, kisermaassisoqalersinnaaneralu ingalasimaneqassaaq.

Aalisarneq inuiaqatigiinni aningaasarsiornermut pingaaruteqarluinnarpoq. Siumup sulissutigaa aalisarneq ineriartortinneqarlunilu naleqqussarneqartuartarnissaa, taamaalilluni nunatsinni imminut napatissinnaanerup siuarsarneqarnissaa piniassammat.

Piujuaannartitsineq tunngavigalugu aalisarneq akuersissuteqartarnikkut ingerlanneqassaaq, atortorissaarutillu akuerisaasut atorlugit aalisarneq ingerlanneqartassaaq nakkutigineqarlunilu.

Sinerissap qanittuanut aalisartunut avataasiortunullu pisassiissutit inuiaqatigiit tamarmiusut annertunerpaamik iluaqutigisinnaasaannik agguataarneqartassapput. Kangiani pisassiissutit amerlanerusut sumiiffimmi aalisartunit aalisarneqartassapput.

Peqassutsi pillugu pinngortitaleriffimmit misissuinerit misileraanerillu imartatsinnut tamarmiusumut siammartinneqassapput, aamma aalisarfigineqanngitsut misileraaffigineqarnissaat siunertaralugu ataavartumik aalisartunut pisassiissuteqartoqartassaaq.

Pisassiisarnermi tunngaviusoq tassaassaaq piujuartitsineq, aalisakkat qaffasinnerpaamik naleqartinneqarnissaat, innuttaasunit atorluarneqarnissaat kiisalu inuussutissarsiortut ineriartornissaanut periarfissiissuteqarnissaq.

Pisassiissutit akuersissutitut sivisussusilerneqassapput, aamma unioqqutitsisoqartillugu nalingi tunngavigalugit arsaarinnissutigineqartassapput.

Aalisartut inuusuttut, ilaatigut umiatsiaararsortut, pitsaanerusumik sinaakkutissinneqassapput aamma inuusuttunut pisassanik qulakkeerinnittarnissaq eqqumaffigalugu ingerlatsisoqassaaq, soorlu kvotebanki tamatumani aqqutigineqarsinnaasunngorlugu aaqqissuunneqassasoq.

Sumiiffinni tunitsiviit tigusisinnaassusaat malinnaaffigeqqissaarneqassaaq, piffissaagallartillugu alliliisinnaaneq piareersimaffigeqqullugu. Tunitsiviit ullutsinnut naleqquttumik atortulersorneqarsimassapput aserfallatsaalineqarsimassallutillu, aamma aalisarluarnerup nalaani ulloq unnuarlu ammasarsinnaanissaat anguniarneqassaaq.

Aalisarnissamut piumasaqaasersuisarnermut uku ilanngullugit qulakkeerneqarsimassapput:

• Aalisakkat aningaasarsiornermik toqqammavigineqartut tamarmik nunatsinni angerlarsimaffeqartunit pigineqassapput.
• Nuna allamiut isumaqatigiissutit naapertorlugit imartatsinni aalisartut piumasaqaatinut unioqqutitsisimappata pisassiissutit arsaarinnissutigineqassapput.
• Avataasiortut pisassiissutinik tunineqartut, tamarmik nunatsinni ineriartortitsinermi peqataanissaat piumasaqaataassaaq.
• Toqqaannartumik toqqaannanngitsumillu piginnittuuneq aalisakkanut qalerualinnullu tamanut atuutissaaq.
• Pisassiissutit tamarmik kvote-andeleqassapput.
• Sinerissap qanittuani raajarniat namminneq aaliangersinnaasariaqarpaat pisatik sumut nunamut tunerusunnerlugit.
• Tulaassisussaatitaaneq allanngortittariaqarpoq, sumiiffimmi naleqqussaanissaq siunertaralugu procentit allanngorartunngorsinnaanngortillugit.
• Ukiunut 29-inut killiliisimaneq (aalisalerusuttut nutaat pillugit) qaffasinnerussasoq Siumup qulakkeerumavaa.