Nunarsuarmi pisut siammasissumik suleqatigiinnermik pisariaqartitsiffiupput, aatsaat ikioqatigiikkutta innarleruminassuseq annikillisissavarput, aatsaat taamaaliorutta kiffaanngissuseq anginerusoq pilersissavarput.
All.: Vivian Motzfeldt, siulittaasup tullia
Partiitsinnut suleqataarusuttut tikilluaqqusaajuaannarput, tamattali kiffaanngissuseqarpugut, taamaammat partiimut allamut nuuttut taamaaliorniarunik taamaaliorlik aamma taakku allatigut suleqatigiumaarpavut.
Kusanartutulli isiginngilara ukiorpassuit partii ilaasortaaffigisaq aatsaat aninermi oqaatsinik kusananngitsunik oqaasertalersuiffigalugu matumik matusineq. Partiitsinni suleriaaserput taannaavoq, anguniakkavut ukiut pingasukkaarlugit nutartertarpavut, ataatsimeersuarnermilu aaliangiunneqartut aallaavigalugit sulinerput ingerlattarlugu – takinerunanilu naannerunngilaq.
Immikkoortortaqarfiit tamarmik, minnerunngitsumik Nuuk, kaammattorusuppakka sumiiffimmi politikikkut suliassat suliareqqullugit. Immikkoortortaqarfik siuttuuffigisaq politikikkut tamanik inissaqartitsilluni isummanik pikialaartitsivioqqullugu, tamannami tamatta pisariaqarteqaarput.
Siunnerfiit inissinneqarsimapput
Aasaq ataatsimeersuarnermi siuttussatsinnik toqqaareerpugut. Ataatsimeersuarnermi siunnerfiliussaasut aallaavigalugit timitalersuillutalu sulivugut, suliat ingerlasut inuiaqatigiinnut iluaqutaasussat nukillaarsarneqassanngillat ajorsarnerlunnermit, taamak pissuseqarneq ineriartuutaanngisaannarpoq.
Demokratii tassaavoq oqaloqatigiinneq amerlanerussuteqarnikkut ingerlatsivik; demokratii oqaloqatigiinnermiippoq, naaperiaaffissarsiornermiippoq. Tamanna piginnaaneqarfiginngikkutsigu demokratii nunatsinni inissinnerlussaaq.
Naaperiaaffissarsiorluta sulineq ingerlassimanngitsuugutsigu inuiaqatigiit sumut killissimassagaluarpat? Qinigaaffik aallartilaaginnartoq qinersisoqarnissaanik suaaruteqartoqarsimassagaluarpoq. Attassisinnaassuseqarneq aatsaat taamak pisariaqartigilerpoq. Nunatsinni inuuniarnikkut unammillikkagut nunarsuarmi pisunit annertoorujussuarmik sunnerneqarput, ullut tamaasa sulivugut inuiaqatigiittut nukittunerusumik inissisimanissarput tunaartaralugu. Nunarsuarmi pisut siammasissumik suleqatigiinnermik pisariaqartitsiffiupput, aatsaat ikioqatigiikkutta innarleruminassuseq annikillisissavarput, aatsaat taamaaliorutta kiffaanngissuseq anginerusoq pilersissavarput.
Pissutsit piviusut aallaavigissavagut
Siumumi sulivugut namminiilivinnissaq tunaartaralugu, taamaaliussaagulli pissutsit piviusut aallaavigalugit, taamaaliussaagut sanngiinnerusortavut aamma eqqarsaatigalugit, taamaaliussaagut inuiaqatigiit tamaasa allorassaaqatigalugit, imaanngitsoq nammitsinnik sapinnginnatta tassa naammattoq, naamik akisussaaffeqarpugut innuttaasut tamat toqqissisimasumik ingerlaqatiginissaannut.
Namminiilivinneq inuttut ataasiakkaatut ilaqutariittullu nammineq nappassinnaassutsimit tunngaveqarpoq, soorlu aamma kinguaassavut eqqarsaatigalugit meerartatsinnik paarsilluarnermi ittoq.
Suut tamarmik uagutsinnit aallartiffeqarput, siullertut namminiilivinneq inuttut ataasiakkaatut nammineq napatinnermiippoq, meerartanik paarsilluarnermiippoq, allanik pisuutitassarsiunnginnermik aallaaveqarpoq. Alloriarneq siulleq tassaniippoq tassa uagutsinni.
Sumut ingerlanialinnginnermi tunngavigisaq ilisimasariaqarpoq – suaartarusaarneq pisuutitassarsiorneq uagutsinniinngilaq, nilliasumiippoq.