Kulusummi solari 120.000 literi nunamut immamullu kuuppoq. Eqqugaapput ulluinnarni nunamik immamillu atuisut. Mittarfeqarfiit erngertumik taarsiissussanngortinneqanngikkunik, Naalakkersuisut ajunaarnersuaqarnermut aningaasaateqarfimmik atuillutik aallartissasut Siumup kaammattuutigaa
All.: Lars Poulsen, Inuussutissarsiorneq pillugu oqaaseqartartoq, Siumut
Decembarip tallimaani Kulusummi solari 120.000 literi Mittarfeqarfiit orsussaasivianit nunamut immamullu kuuppoq, nunarujussuaq imartarlu annertooq mingutsinneqarlutik.
Pisoq ajunaarneruvoq pisuusoqarani pisoq, tassami Mittarfeqarfimmi sulisut piaarinaatsoorlutik taamak inissittoorput. Naatsorsuutigineqartariaqartorli tassaavoq, Mittarfeqarfiit nunaqqatigiinnut paasissutissiisimanissaat, pingaartumik suut mianersorfissaanersut mingutsinneqarsimanersullu pillugit.
Eqqugaasut tassaapput ulluinnarni immami atuisut, minnerunngitsumik inuussutissarsiutigalugu sumiiffimmi piniartut. Kingullertigullumi tusagassiuutit aqqutigalugit tusarparput, sumiiffimmi piniartut piniagassaqarniarnikkut annertuumik eqqugaasimasutut avammut ilisimatitsisut.
Pisup kingorna puisit, timmissat aalisakkallu aningaasarsiutigalugit piniarneqarsinnaanerat killeqarnerulerpoq, tassami imartaq annertooq orsussamik qallerneqarsimavoq, ukiuummallu imarmi uulia imaaliallaannarluni aalannguunnavianngitsoq ilisimasallit oqaatigaat.
Ajunaarnersuaq
Piniarluni inuussutissarsiuteqarneq kisimi eqqugaannani, aamma ilaqutariit imminnut pilersorsinnaanerat annertuumik innarlerneqartoq ilisimavarput. Ulluinnarni nerisassanik piniarneq ajornarnerulerpoq, pinialuttartut ilanngullutik eqqugaallutik.
Nalliuttut annerit takkutilerput, aningaasarsiornerlu sumiiffimmi unittuuissimasutut isigineqartariaqartoq isumaqarpunga, taamaattumillu akisussaaffimmik tigusisoqassasoq kissaatigaara, tamannalu piaarnerpaamik Naalakkersuisut isummerfigissagaat kaammattuutigaara.
Pisortat ingerlataata ajutoornera, innuttaasut inuuniarnerinut annertuumik innarliivoq, taamaattumillu Mittarfeqarfiit erngertumik taarsiissussanngortinneqanngikkunik, Naalakkersuisut ajunaarnersuaqarnermut aningaasaateqarfimmik atuillutik aallartissasut Siumup kissaatigaa.
Aningaasaateqarfik
Aningaasaateqarfik pineqartillugu, ilanngullugu kissaatiginassaaq, aningaasaateqarfik erseqqissunik malittarisassaliuunneqarpat, taamak assingusunillu pisoqartillugu qaqugukkut Naalakkersuisut namminerisamik iliuuseqartalernissaat aqqutissiuunniarlugu.
Taamaaliorutta Naalakkersuisut pisariinnerusumik aalajangiisinnaanngussapput, assingusunik pisoqartillugu kaammattorneqarnissartik utaqqinngikkaluarlugu erngertumik iliuuseqarsinnaanngorlutik.