Kusanaatsuliat matussuserniarlugit Kommuneqarfik Sermersuup 1.250 million koruuninik aningaasanik qinnuteqarnera Naalakkersuisut oqaluuserissavaat sisamanngorpat 15. december. Tassunga atatillugu Siumut Nuuk, Siumut Tasiilaq aamma Siumut Paamiut piumasaqaateqarput
Ippassaq sapaammi 11. december Kommuneqarfik Sermersuumi kommunalbestyrelsimi Siumut ilaasortaatitai Siumup siulittaasuanut Erik Jensenimut piumasaqaatinik nassiussipput Naalakkersuisut aningaasanik 1.25 mia. koruuninik qinnuteqaataannut oqaluuserinninnissaannut.
Kommunalbestyrelsimi Siumumi ilaasortat qinigaaffimmi kingullermi maannalu nakkutilliisutut inissisimasimavoq aamma kommunalbestyrelsimi aalajangiinernut arlalinnut – aamma politikkikkut aalajangersagaanngitsunut -apeqqusiisarpoq, taamaattorli suliat ingerlatiinnarneqartarput.
Nuummi, Paamiuni aamma Tasiilami immikkoortortani allakkat akuerineqartuni, ilaasortat Naalakkersuisuni Siumut sinnerlugu ilaasortanut piumasaqarput.
– Ilaatigut Siumumi gruppip piumasaraat annertusisamik aamma arlaannut attuumassuteqanngitsumik kukkunersiuisoqassasoq taskforcemik peqateqartumik, taakku ukiuni kingullerni kommunip aqunneqarnera misissussavaat, gruppip siulittaasuat Inga Dora G. Markussen aallarniivoq.
– Siorna kommunalbestyrelsimi ilaasortanngorattali alla suliarinngilarput ukiut siuliini aalajangikkat isummersorfigineri, ukiunimi qulikkaani tulliuttuni kommunip aningaasaqarnera sunnertussaammagit. Inuinnaalluni piffissaq ilungersunarsimavoq, isumaqarpugummi 1,25 mia. koruuninik atorniartoqalerneramik aamma aningaasat sumut atorneqarnissaannik immikkut ilisimasallit nassuiaateqartinneqartariaqartut, kisianni aamma aalajangiinerpassuit aningaasanik 300-400 mio. koruuninik inissanut akiliisinneqarnissatsinnut tunngasunut, isumaqatigiissutillu atorunnaarpata ukiut qulit qaangiuppata inissianilu taakkunani kvadratmeterinnguamilluunniit ataatsimik piginnittunngorsinnaanata, itisiliivoq.
Allakkami misissuinissamut piumasaqaatit arlallit allattorneqarsimapput Siorarsiorfimmut – NCD-mut tunngaannanngitsut. Takussutissaqarpormi iternga tikillugu misissorneqartariaqartunik.
– Innuttaasut matoqqasuni aalajangikkat amerlasuut ilisimasaqarfiginngilaat, tassanilu isumaqarpugut inatsisitigut aningaasaqarnikkulluunniit ”matussusersorneqarsinnaanngitsuni”. Kommunalbestyrelsimi ilaasortatut unnuami sinilluarsinnaanngilagut nalunagu aalajangikkanut tamakkununnga akisussaasuulluta. Qujanartumik sapinngisaq tamaat oqaluuserineqartuni amerlasuuni 2018-imiilli ikinnerussuteqartutut oqaaseqarfigisarpagut Aningaasaqarnermut Inuussutissarsiornermullu Ataatsimiititaliami aamma Kommunalbestyrelsimi. Inatsisit najoqqutaralugit ingerlasoqarsimannginneranik misigisimaneq nuanninngilaq, aamma pisooqataasunngorsinnaalluta ilisimallugu oqaaseqaqqusaannginnerput pissutigalugu, nangipporlu:
– Akisussaaffimmik tigusisoqartariaqarpoq torersaasoqarlunilu, aamma Kommuneqarfik Sermersuumi innissisimaffimmi ilungersunartumi aaqqiissutissat aallartinniassavagut. Iternga tikillugu misissuinerit aqutsisoqarfimmut tatiginneqqilernissarput periarfississavaa aamma suleqateqarusussuseq pisariaqavippoq. Eqqaamassavarput 1.250 mio. koruunit aningaasarpassuupput aamma eqqarsaqqaarani akueriinnagassaanngilaq, tassami aappaatigut kommune alla aqunneqalerpoq kiffartuussinini attatiinnarniarlugu 30 mio. koruuninik atugassarsiniarmat, taava tamanna qanoq paasineqassava? Kommuneqarfik Sermersuumi najugaqarfiit tamarmik aalajangikkat taakku tamaasa akiligassarilissavaat illoqarfimmi pingaarnermi IA-p Demokraatillu aamma massakkut Naleqqap ”qineqqusaarutitik piviusunngortinniarlugit” aalajangigaat. Inuiaqatigiinni pissutsit akisussaassuseqanngitsunik taaneqartartut ”naalagaaffiit inatsisaatsut” nunatsinni atortinneqarnissaat Siumumi kissaatiginngilarput. Pisortani aqutsisutut inatsisit malittariaqarpagut. Naggat, siulittaasoq oqarpoq.
Ukiuni kingullerni Naalakkersuisut isummerfigisassaanut allanut innersuussivoq.
– KNI-mi kanngunartuliamut iternga tikillugu misissuinissamik piumasaqartoqarsinnaappat Siumumi ilaasortat Kommuneqarfik Sermersuumut atatillugu piumasaqaataat malissallugit pissusissamisoorpoq. Naalakkersuisut taamaasiussanngippata pissutsinut aatsaannguummat taasannut pisimassaagut, oqarpoq.
Sermersuumi Siumumi ilaasortat, Siumut Nuuk, Siumut Paamiut aamma Siumut Tasiilaq neriuutigaat allagaq Siumut siulersuisuunerini piaarnerpaamik oqaluuserineqassasoq.
Kommuneqarfik sermersuup aningaasanik atorniarnera Naalakkersuisut sisamanngorpat 15. december oqaluuserissavaat.