All.: Lars Jørgen Kleist, siulittaasup tullia, Siumut Nuuk
Siullermik SIUMUT Nuummiit isumaqarpugut ajuusaanarluinnartoq Kommuneqarfik Sermersuumi ulluni 17-18. november 2022, Aalisarneq pillugu isumasioqatigiittoqarnerani inuussutissarsiutigalugu Piniarlutik aalisartutullu Ittoqqortoormiuneersut peqataatinneqannginnerat.
SIUMUT Nuuk isumaqarpoq – ukiorpassungortoq Tunumi inuussutissarsiornikkut inerisartortitsiniarneq isumasioqatigiinnerpassuarnillu ingerlatsivineqartareersoq – maannangaaq politikikkut inerisaanissaq ingerlanneqartariaqalersoq.
Qanoq ingerlariaqqissaagut? Susoqartariaqarpa?
Nalunngilarput Tunup sineriaa – avataalu aalisagarpassuaqartoq (raajat, saarulliit allallu) aammalu soorlu Tasiilap eqqaa aalisagarpassuaqartoq allaat qaleraleqarfissuulluni. Taamaattumik piaarnerpaamik Ittoqqortoormiut kangerlussua – Nunarsuarmi kangerlussuit anginersaat aalisarnikkut misileraaffigineqartariaqarpoq – aalisartut piniartullu Ittoqqortoormiormiut peqataatillugit. Tassami Ittoqqortoormiuni aalisartut piniartullu nuna najugaqarfitsik nalunngilaat.
Naalakkersuinikkut aningaasaliisoqartariaqarpoq Ittoqqortoormiit eqqaani aalisakkanik soorlu 2023-imi aasaanerani Pinngortitaleriffik suleqatigeqqissaarlugu misileraasoqarluni. Taamaasilluni aalisarnikkut inerisaasinnaanermut tunngavissat aallatinneqarsinnaalissapput.
Pinngortitaleriffiup ilisimatuussutsikkut misissuutitaava Tarajoq kilisaat nutaavissuaq atorlugu misissuinissaq pitsaasumik ingerlanneqarsinnaavoq.
Tunup puujugaanera – Ittoqqortoormiut aammalu Tasiilap nunaqarfiilu aalisarnikkut siuarsarneqarnissaat aallartittariaqalerpoq – ukiorpassuarni Naalakkersuinikkut iliuuseqannginneq tamaanga killeqartariaqarpoq.
Piniartuunermiit aalisartuunermut ikaarsaarnissaq tamaviaarutigisariaqalerpoq.