Hybridbiilit akitsuusersorneqarnerisa allanngortinneqarnissaat Siumup tunngaviusumik isumaqatiginngilaa. Inuit ataasiakkaat kaasarfii kisiisa assallugit aningaasarsiornikkut unammilligassat anigorneqarsinnaanngillat. Siumup naatsorsuutigaa, siunnersuut tunuartinneqassasoq
All.: Doris J. Jensen, politikikkut oqaaseqartartoq, Siumut
Aningaasaqarnermut Naalakkersuisoq, Naaja H. Nathanielsen (IA) Naalakkersuisut quppernerat aqqutigalugu juunip 15-iani ilisimatitsivoq, hybridbiilinut akitsuutit allanngortinneqassasut, ilaatigut oqarluni biilit taamaattut piffissap ingerlanerani akitsuusersuinikkut akisunerulernissaat siunertarineqartoq.
Taamak ilisimatitsineq Siumup tunngaviusumik isumaqatiginngilaa. Inuit kaasarfiinit aalliinnartarluni nunatta aningaasarsiornikkut unammilligassai anigorneqarsinnaanngillat. Inuiaqatigiittut aningaasarsiornerput mattuttartulersuinnarlugu siumut aallartinneqarsinnaanngilaq. Qanoq iliorluta isertitaqarnerulernissarput sammineqartariaqarpoq, pingaartumik inuit sulisinnaasut namminnerlu periarfissarsiorusuttut tapersersorneratigut aningaasaliissussarsiorlunilu ingerlatseqataanikkut.
Siumut isumaqarpoq akileraartarnermut aaqqissuussisimanerput nalilersoqqinneqassasoq, tamannalu suut ataasiakkaat tigullattaaginnarlugit naammassineqarsinnaanngitsoq. Akileraartarnikkut aaqqissuussisimanerput tunngaviusumik nalilersoqqinneqassasoq Siumup kissaatigaa, pingaartumik isertitakinnerusut pitsaanerusumik aaqqissuussivigineqarnissaat siunertaralugu. Akileraarutit akitsuutillu ataatsimoortumik tunngaviusumillu nalilersoqqinneqarlutik suliarineqassapput, tamatsinnut oqimaaqatigiinnerusumik aaqqissuussinissaq anguniarlugu.
Aningaasaqarnermut Naalakkersuisumit una siunnersuutigineqartoq nukissiuutit atasinnaasumik atornerujartornissaanut akerliuvoq, aamma nukissiuutit qanoq ittut atorlugit siunissami qorsunngoriartornissatsinnut akerliuvoq.
Pineqartoq maajip 30-ani ukioq manna Siumup naalakkersuisumut apuussimavaa, oqarluni taamak ilusilimmik siunnersuuteqartoqassappat Siumup tapersersuinissaa naatsorsuutigineqarsinnaasanngitsoq. Siumut erseqqissumik oqariartorpoq, siunnersuut ataatsimut nalilersueqqinnermut tunngatinnagu saqqummiunneqassappat, Siumut akueriuminaatsitsissasoq.
Nunatta aningaasarsiornerata siuarsarnissaa suliassatsitut tigussagipput Siumut isumaqarpoq, tamatumani aningaasarsiornitta annertunerulersinneqarnissaa naalakkersuinikkut suliarineqassalluni.
Inuiaat Kalaallit kiffaanngissuseqarnerulernissaat naalakkersuinikkut anguniagaavoq. Tamanna inuit ataasiakkaat kaasarfii kisiisa assallugit angusinnaanngilarput. Aningaasarsiorfissat nutaat ujartorneqassapput, ilutigisaanillu akileraartarnermut nalilersueqqinneq tunngaviusoq ingerlanneqassaaq.
Nutaanik akitsuusersuinissamut Aningaasaqarnermut Naalakkersuisup siunnersuutaa maanna tusarniaassutigineqarpoq. Siumup naatsorsuutigaa, siunnersuut tunuartinneqassasoq.