Ministeria ima suliaqassasoq, Inuiaat Kalaallit qanoq Danmarkimut nioqqutissanik tuniniaasinnaanerannik ilitsersussallugit aamma qallunaatut ilinniartissallugit. Ilutigisaanik Inuiaat Kalaallit suliffissaqarneq pillugu qanoq danskit paasinnittariaaseqarneranik ajoqersorneqassasut. Ilanngulluguttaaq Kalaallit Nunaata nunanut allanut politikeqarnissaa killilersorneqassasoq Danmarkimullu naleqqussarneqassasoq. Kalaallillu inuusuttortaasa Danmarkimut ilanngutitinneqarnissaat siunertaralugu ilaqutariinnik paarsisussarsiortoqassasoq, inuusuttut Danmarkimut atuariarnerannut ilinniariarnerannullu atatillugu paarsisussanik. Det Konservative Folkepartip oqallissaarutitut saqqummiussaat ilaatigut tamakkuninnga imaqarpoq
All.: Erik Jensen, siulittaasoq, Siumut
Oqariartuut “Naalagaaffeqatigiit nukittunerulersikkumavagut qaqugorsuarmullu atassapput” tamanik oqaluttuaraluarpoq, Det Konservative Folkeparti inuiaat danskit inuiaallu kalaallit akunneranni qanoq pissutsit innerannik qangarsuarli kinguusaasimasut. Partiip kissaatigaa naalagaaffeqatigiit akornanni qaninnerusoqalissasoq, taamalu qulequtsiilluni Kalaallit Nunaanni partiit Katuami oqallinnissamut qaaqquai.
Oqallissaarut quppernialunnik takissusilik ima pineqartumut uniuitigaaq, imaa tutsuiginassuseqanngitsutut nalilerlugu Siumut peqataasinnaanngitsutut inississimalluni, taamaattumillu aalajangersimalluni Det Konservative Folkepartip oqaloqatigiinnissamut qaaqqusissutaanut peqataaniarani. Nassuiaataa malinnissaaq.
Naalagaaniarneq
Oqallissaarutiminni partii ilaatigut allappoq, danskit naalakkersuisui aamma Kalaallit Nunaannut naalakkersuisuusut, taamaakkamilu Danmarkimi naalagaaffeqatigiit pillugit ministeria pilersinneqassasoq suliassarissallugit ilinniartitaaneq, oqaatsit, inuussutissarsiorneq aamma nuttarsinnaaneq isumasiussallugit. Tamakku saniatigut ministeria nunatsinni sumiiffinni naalagaaffeqatigiit pillugit allaffeqarfiliussaaq, allaffeqarfinni suliassaassallutik Inuiaat Kalaallit ajoqersorneqassasut, suliffissaqarneq danskit paasinnittariaasiat naapertorlugu qanoq paasisariaqarnersoq aamma Inuiaat Kalaallit qanoq nioqqutissanik Danmarkimut tuniniaasinnaanersut, danskisut ilinniartinneqarnissaat ilanngullugu.
Partiip aamma takkorliorsimagunarpaa piviusoq, tassalu Kalaallit Nunaat nammineq naalakkersuisoqarnikkut annertusiartortumik ingerlatsimmat, aqqullu taanna utertitassaannani inissisimammat. Oqallissaarummi Det Konservative Folkeparti siunnersuuteqarput, Kalaallit Nunaata namminerisaminik nunanut allanut politikeqarnissaa qajannarsisinneqassasoq, oqarlutik, suut tamarmik Danmarkimut tulluarsarneqassasut. Assersuutigalugu partiip takorloorpaa, Folketingimi nunanut allanut ataatsimiititaliaq Kalaallit Nunaanut inissamik ataatsimik pilersitsissasoq, ilutigisaanillu parlamentit ukiumoortumik ataatsimiisinneqartalernerisigut, Danmarkip nunanut allanut politikianut Kalaallit Nunaat naleqqussarlunilu pituttorneqassasoq. Taamaalilluni takorloorneqartut ilagaat, Kalaallit Nunaata Folketingimi inissaa “qaqugorsuarmut” allanngutsaaliorneqarluni inissisimatinneqassasoq.
Det Konservative Folkepartip sunnersuutaanni eqqumiikajaarnerit ilaattut tikinneqarpoq, aaqqissuussineq nutaaq eqqunneqassasoq siunertaalluni, kalaallinut inuusuttunut angajoqqaarsiassanik nassaartortoqassasoq, inuusuttut Danmarkimut atuariaraangamik ilinniariaraangamilluunniit inissisimaffigisartagassaanik. Partii isumaqavissimavoq, Danmarki Kalaallit Nunaannut qitiulluni inissisimassasoq, aamma inuusuttortagut sivisuumik nunaminiissatinnatik kulturikkut unammilligassarpassuaqartarsimassasut, taamaakkamilu ilaqutariinnut inissinneqartassasut, ilanngutitinneqavinnissaat siunertaralugu danskit oqaasiinik sakkortuumik ilinniartinneqarniassammata. Arraami, partiip taagaluarpaami killormut angallanneq pisinnaassasoq. Taamaattoq siunertarineqarunnanngilaq, danskit inuusuttortaat kalaallit ileqquannut pingaartitaanullu ilanngutitinniarneqarnissaat ingerlanneqassasoq.
Tutsuiginartumik oqallinneq siunertaqartorlu kissaatigineqarpoq
Kalaallit Nunaata Danmarkillu akornanni pissutsit pillugit tutsuiginartumik oqaloqataanissamut Siumut ammavoq. Kisianni oqallinneq qanoq ullumikkut inissisimanitsinnit aallaaveqartariaqarpoq aamma inuiaat akunnitsinni unammilligassatsinnut tigussaasumik tunngaveqartariaqarpoq. Oqallissaarut ataatsimut isigalugu kingumut isigisoq kinguneqartussamik tunngaviliinavianngilaq, aamma sutigut tamatigut Kalaallit Nunaata nammineerneranut suusupaginnippoq, Namminersorneq pillugu Inatsit ilanngullugu.
Inuiaat Kalaallit inussiaataanissaanik siunertaqarluni Det Konservative Folkepartip nukangasumik takorluukkersaarnerat qanga pissusiusimasunut utersaarneruvoq. Inuiaat Kalaallit ullut tamarluinnaasa namminersulernissartik siunertaralugu sulipput, taamalu silarsuarmioqatiminnut appakaakkiartorlutik qaammaasaqarnerujartorlutillu, tamarmik inuiannik allanik suleqateqarnerulernissamik niueqateqarnerulernissamillu siunertallit.
Siumup ingerlavissatut kissaatiginngilaa, Inuiaat Kalaallit aammaartumik Danmarkimut pituttorneqassasut, taamalu Danmarkip illorsuata tunuata tungaani inuuneqassasugut danskillu politikiannut sanilliulluta appasinnerusumik inissisimassasugut. Tamanna pinavianngilaq.
Det Konservative Folkeparti ilumoorunneqarumagunik aallaqqaatigalugu partiip Namminersorneq pillugu Inatsit atuarsinnaavaa, partiillu isumaa naapertorlugu tassannga qulequttanik tigusillutik, taamalu akunnitsinni siuariartornissatsinnut suleqatigiissinnaassuseqarnissatsinnullu siunertalersueqataallutik.
Taavalu naagga. Naalagaaffeqatigiit, Det Konservative Folkepartip paasinnittariaasiat naapertorlugu, Danmarki akigalugu avissaariartorfiunngillat. Tamanna isumaqaannarpoq, Inuiaat Kalaallit inissaminiittumik naalagaaffinngorusukkamik. Tamanna partiip talerperliuniap, Det Konservative Folkepartip, tapersersortariaqaraluarpaa oqaloqataaffigalugulu, killormut kissaatiginagu kalaallit illoqarfiannut kæmnereqarfiit pilersiortorneqaqqissasut.
Nunarput aalajaappoq piujuassaarlu!