Kommune Qeqertalik atuutilermalli utoqqaat pillugit siunnersuisooqatigiinnik pilersitsisoqassasoq utoqqaat neriorsorneqartarsimapput. Ulloq mannali tikillugu suli Kommune Qeqertalimmi utoqqaat pillugit siunnersuisooqatigiinnik pilersitsisoqanngilaq
All.: Aqqa Samuelsen, Kommune Qeqertalimmi kommunalbestyrelsimi Siumut gruppiani siulittaasoq
Kommune Qeqertalimmi utoqqaat neriorsorneqartarlutik qineqqusaarutaannartut inissinneqartarnerat Qeqertalimmi Siumumit akuerinngilarput. Utoqqarnut neriorsuutit timitalersorneqartariaqalerput. Taamaammat Kommune Qeqertalimmi utoqqaat pillugit siunnersuisooqatigiinnik pilersitsisoqarnissaanik Siumut gruppianiit piumasaqarpugut.
Kommune Qeqertalimmi utoqqaat qineqqusaarutaannartut inissillugit utoqqaat pillugit siunnersuisooqatigiinnik pilersitsisoqarumaartoq neriorsorneqartarsimapput. Taamatullu utoqqaat qineqqusaarutaannartut inissinnagit maannakkut timitalimmik sulisoqarluni piviusunngortitsisoqassasoq Siumumit piumasaraarput.
Kommune Qeqertalimmi utoqqaat siunnersuisooqatigiit qaqugu pilersinneqassanersut utoqqaat peqatigiiffiiniit ilaatigut ujartorneqarpoq. Utoqqaat peqatigiiffiisa ujartuinerat Siumumit tusaavarput paasilluarsinnaallugulu.
Kommune Qeqertalimmi utoqqaat pillugit siunnersuisooqatigiit qaqugu pilersinneqassanersut paaserusullugu kommunalbestyrelsip ataatsimiinnissaanut erseqqissumik paasissutissiisoqarnissaa Siumumit kissaatigaarput.