Vivian Motzfeldt, Inatsisartunut ilaasortaq
Inatsisartut suleriaasianni § 37 imm. 1 naapertorlugu Naalakkersuisunut apeqqut imaattoq matumuuna saqqummiuppara:
Naalakkersuisunut apeqqut:
- Nunatta kujataani inuussutissarsiornikkut ineriartortinniakkat suuppat?
- Suliffissaqartitsinikkut annertuumik sunniuteqarsinnaasut suut inerisarneqarpat?
- Aatsitassarsiorsinnaaneq periarfissaajunnaareerpoq, taavami qanoq ineriartortitsisoqarniarpa.
- Takornariaqarneq qanoq ineriartortissallugu pilersaaruteqarfigineqarpa?
- Puulukit kukkukuullu qineqqusaarnermi neriorsuutigineqartut sumut killippat?
- Inuit pilluaatissaat takkuttussatut qineqqusaarutigineqartut suummitaava pineqarpat?
Tunngavilersuut:
Ilaqutariippassuit nunatta kujataani najugaqartut, meeqqanik pilersugaqartut inuussutissarsiornikkut suliffissaqarnikkullu periarfissaat qanoq naalakkersuinikkut inerisarniarneqarnersut paaserusuppakka.
Periarfissat siunnerfiillu namminneerlutik takkunneq ajormata, aatsaalli sulissutiginerisigut ineriartortinneqartarmata qanoq sulissuteqartoqarnersoq killiffissiorlugu matumuuna apeqqutinik Naalakkersuisut apuussiffigaakka.
Apeqqutit ullut suliffiusut qulit iluini akineqassasut kissaatigaara.