All.: Aqqa Samuelsen, Kommune Qeqertalimmi kommunalbestyrelsimi Siumut gruppiani siulittaasoq
Kommune Qeqertalimmi aalisartut piniartullu isumasioqatigiissinneqartariaqarput.
Kommune Qeqertalimmi aalisarnikkut piniarnikkullu pissutsit ulluinnarni susassaqartunit isummersorfigineqarlutillu pilersaarusiorneqartariaqarput.
Kommune Qeqertalimmi aalisartut piniartullu eqqarsaatigalugit inuussutissarsiornikkut ulluinnarnilu atugassarititaasut pitsanngorsarniarlugit iliuuseqartoqarnissaa pisariaqarpoq.
Kommune Qeqertalimmi illoqarfinni nunaqarfinnilu puttasoqarnikkut, tunitsiveqarnikkut, neqitsersuiveqarnikkut, ammeriveqarnikkut umiatsianik iluarsaassiveqarnikkut, aammalu aalisarnermut piniarnermullu tunngatillugu ileqqoreqqusaqarnikkut pitsanngorsaanerit ingerlanneqartariaqarput. Ulluinnarni susassaqartut Kommune Qeqertalimmi aalisartut piniartullu qanimut isumasiorneqarlutik ulluinnarni atugassarititaasunut pitsanngorsaanermi peqataatinneqartariaqarput.
Kommune Qeqertalimmi aalisarnikkut piniarnikkullu pisasseeriaatsit eqqarsaatigalugit susassaqartut aalisartut piniartullu isumaat tusaaniarneqassasut kommunalbestyrelsimi Siumut gruppiata pingaartippaa. Kommune Qeqertalimmi aalisartut piniartullu isumasioqatigiissinneqarnissaat piviusunngortinneqassasoq kommunalbestyrelsimi Siumut gruppiata piumasarivaa.
Inuit Ataqatigiit Atassullu politikkikkut suliassatut pingaartitat anguniagassaallu 2021-2025 aallaavigalugu immikkoortoq 8-mi qulequtaq Aalisartut piniartullu ilaatigut ima oqaasertaliussaqarpoq:
”Qeqertalimmi Aalisartut Piniartullu isumasioqatigiissinneqarnissaat anguniarneqassasoq isumaqatigiissutigineqarpoq 2021-mi aamma 2023-mi. Ilaatigut qilalugarniartarnermut tunngasoq aammalu ileqqoreqqusat nutarterneqarnissaat suliarineqarnissaallu eqqarsaatigalugit”.
Aalisartut piniartullu ilaasa Inuit Ataqatigiit Atassullu isumaqatigiissutaanni allassimasoq aalisartunik piniartunillu isumasioqatigiissitsinissaq siunertarineqartoq ilisimavaat paasisimallugulu.
Politikkikkut suleqatigiinnissamut isumaqatigiissut kommunip aqunneqarneranut toqqammavittut atuutsinniarneqartussaq Inuit Ataqatigiit Atassutillu atuutsinnagu saneqqullugulu ingerlatsilernersut paasisaqarfigerusunnarpoq, politikkikkut suleqatigiinnissamut isumaqatigiissut atuutsinneqarluni anguniakkat piviusorsiortumik piviusunngortinniarneqarnissaat pimoorunneqartariaqartoq isumaqaratta. Kommunitsinni aalisartut piniartullu ilaasa 2021-mi qaqugu isumasioqatigiissitsisoqassanersoq erseqqinnerusumik paasisaqarfigerusuppaat. Taamaammat aalisartut piniartullu kommunimiit erseqqissumik paasitinneqarnissaat Kommune Qeqertalimmi Siumut gruppiata kissaatigaa, isumasioqatigiissitsinissarlu piviusunngortinneqassasoq piumasaralugu.