Inissiat akiinik qaffaaneq akuerinngilarput

Naalakkersuisut IA aamma Naleraq ineqarnermut akinik qaffaanerat ilaqutariippassuarnut eqquinerluttussaammat Siumumit akuerinngilluinnarparput. Matussutissatut Nuummi allaffissornikkut atorfinitsitsiortornikkut annertusaanermik aallaavilik aallerfigineqarsinnaavoq

All.: Jess Svane, Siumup Inatsisartuni gruppiata siulittaasua

Siumumiit tupigusoqaagut maanna Naalakkersuisuusut Inuit Ataqatigiit aamma Naleraq inissiat attartortittakkat 2.877-it qaffaaffigineqarnissaat saqqummiummassuk. Siumumiit isumaqarpugut tamanna allatut aaqqinneqarsinnaagaluartoq.

Siumumit maluginiaqqussavarput Namminersorlutik Oqartussat inissiaataanni INI A/S-imiit aqunneqartuni ukiuni kingullerni qaffaasimannginnatta, pissakinnerit, akunnattumik akissarsiallit, utoqqaat aammalu sulisartorpassuarnut eqquinerluttussamik pinaveersaartitserusussimanerput aallaavigalugu. Maannali Naalakkersuisooqatigiit pissakinnernut illersuinerpaatut taajortut kiisalu qineqqusaarnermi nipituuliornerpaajusimasut, killormorluinnaq sulinerat uppernarsarneqartoq Siumumiit tupigusuutiginngitsuunngilarput. Taamaattumik inissiat qaffaavigineqarnissaat Siumup akuerisinnaanngilluinnarpai.

Attartortunit aningaasat innuttaasut kaasarfiiniit aaniarneqartut 4,9 mio. kr-inik nalilik allatut aaqqinneqarsinnaasoq Siumut isumaqarpoq. Soorlu nunatta immikkoortuini suliffissaaleqiffiusuni aammalu aningaasarsiornikkut unammilligassaqarfiusuni ineqarnermut akit qaffaaffigineqarput 9 procenti tikillugu. Taakkulu assut eqqornerlunneqarujussualernerat Siumumiit akuerinngilarput.

Aaqqiissutaasinnaasutut Siumup tikkuarusuppaa, Namminersorlutik Oqartussat allaffissornikkut allisaajunnaarnissaat. Maannami pilersaarutigineqartut malillugit, Ineqarnermut Naalakkersuisoqarfik pilersaarpoq, ukiumut 5,3 mio. immikkoortinneqartalissasut, inuit arfinillit Nuummi sulisinneqarnissaanut, taakku suliassaralugit “Aserfallatsaaliuinermut Aqutsisoqarfimmik” ingerlatsineq. Suliassaq taanna ullumikkut INI A/S-p ingerlallugulu piginnaasaqarfigereeraluaraa.

Taamaattumik innuttaasut kaasarfii aallerfiginagit, 2022-imut aningaasanut inatsisissami siunnersuummi aaqqinneqarnissaat Siumumiit piumasaraarput.