Inatsisartunut ilaasortaq Vivian Motzfeldt, Siumut
Inatsisartut suleriaasianni § 37 imm. 1 naapertorlugu Naalakkersuisunut apeqqut imaattoq matumuuna saqqummiuppara:
Naalakkersuisunut apeqqut:
- Naalakkersuisut paasinnittariaasiat naapertorlugu, inuiaat kalaallit kikkuuppat?
- Inuiaat kalaallit immikkut innuttaassuseqarnerannut iliuusissanik ersarissaanissanilluunniit Naalakkersuisut qinigaaffimmi uani pilersaaruteqarpat?
- Inuiaat Inuit aamma inuiaat Kalaallit Naalakkersuisut qanoq paasivaat?
- Naalakkersuisut pilersaaruteqarpat inuttaassuseqarnermut apeqqut qinigaaffimmi uani suliaralugu aallartinneqassasoq?
Tunngavilersuut:
Namminersorneq pillugu Inatsit inuiaqatigiit oqartussaanerujartornissaanik siunertaqartumik suliaavoq taamalu 2009-mi atuutsilersinneqarluni. Namminersorneq pillugu Inatsimmut tapiliussani suliassat inuiaqatigiit Kalaallit tigusinnaasaat allattorsimapput. Piffissami kingullermi inuiaqatigiinni kina kalaaliusutut isigineqassanersoq apeqqutitut Naalakkersuisut akornannit inuiaqatigiinnut igeriunneqarpoq, pineqarluni qanoq kingoqqisuuneq ilanngulluni apeqqutaatinneqassasoq, genetiki ilanngullugu.
Namminersorneq pillugu Inatsit malillugu inuiaat kalaallit taakkartorneqartut, Naalakkersuisunit kinaassusersineqarsimasutut nipeqartinneqarput, tamassumalu qanorpiaq sammiveqartinneqarnera paasissallugu pingaaruteqarsoraara.
Ullut qulit iluanni akissutisinissara pissasoq naatsorsuutigaara.