Nunarput ingerlanneqassaaq Kalaallisut oqaatsivut pisortatigoortumik oqaasiusut atorlugit.
Taamaattumik oqaatsit pillugit inatsit oqaatitsinnik illersuisoq pilersinneqassaaq.
Nunarput namminersorluni kulturikkut pitsaasunik atugassaqartitaasoq Siumup anguniagaraa, tamannalu ilaatigut “Kulturip ulluanik” pilersitsinikkut annertusarneqassaaq.
Inuiaqatigiit atugarissaartut ilisarnaatigilluinnartarpaat kulturikkut sunngiffimmilu uummaarissumik peqataalluartut. Inuiaqatigiit tamatta suliassaraarput nunaqqatitta kulturikkut sunngiffimmilu peqataanissaannut pitsaanerusunik tunngavissiornissaq kiisalu nunaqqatigiittut qaammarsaqatigiinnissaq.
Piorsarsimassutsikkut ineriartortitsineq tassaassaaq inuiaqatigiinnit aallaavilik, inuiaqatigiit kissaataat aallaavigalugit. Siumumi isumaqarpugut piorsarsimassutsimut pisortaniit aningaasaliissutaasartut Naalakkersuinikkut siunertarineqartunut naapertuuttuusassasut.
Nunatsinni kalaallisut oqaatsitta siunissami ajunngitsumik atugaanissaat Kalaallisullu atuakkiortarnerup ineriartortittuarnissaa siunertaralugu Kalaallit Nunatsinni atuakkiortunngorniarfimmik pilersitsisoqarnissaa Siumup sulissutigissavaa. Siumup sulissutigissavaa kalaallit atuakkiortuisa atuakkiai erianartut ullumikkullu naqiterneqarunnaarsimanertik aallaavigalugu pissarsiariuminaallisimasut naqitertinneqaqqinnissaat. Naqiterinernut ilanngullugit atuakkiat e-book-inngorlugit immaqaluunniit atuakkat atuffassissutitut pissarsiarineqarsinnaanngornissaat sulissutigineqassaaq.
Siumup anguniarpaa nunatsinni suliffeqarfiit pisortat ingerlataat tamarmik oqaatsit pisortatigoortut – Oqaatsivut – atorlugit ingerlatsiviussasut. Siumup anguniarpaa pisortatigoortumik oqaatsit tamakkiisumik atuutsinneqalissasut kingusinnerpaamik ukioq 2025 nallertinnagu, pisortat suliffeqarfiini sulisut oqaatsitsinnik atuinngitsut pisortatigoortumik oqaatsitsinnik ilinniarsinnaanissaminnut pinngitsooratik periarfissinneqassapput.
Tusagassiuinermut tunngatillugu siammasissumik aallakaatitassiortarnerup nukittorsarnissaa pingaaruteqarpoq. Tusagassiornermi pitsaassuseq qaffasinnerpaaq anguniarlugu TV-qarfinni radioqarfinnilu tamani tusagassiuisut teknikerillu ilinniarsimasut atorneqarnissaat anguniarneqassaaq. Nuna tamakkerlugu tusagassiuutit nukittuut, ullumikkornit amerlanerusut siammasinnerusullu pilersinneqassapput tamat oqartussaaqataaneranut pingaaruteqarmat.
Tusagassiuutinik kiffartuussinissamik isumaqatigiissut ullutsinnut naapertuuttunngortillugu nutarteqqinneqassaaq. Aaqqissussaanermi oqartussaasut tassaassapput inuiaqatigiinni ilisimasaqarnertik, naleqartitatsinnik oqaatsitsinnillu piginnaasaqarnertik ilisimasaqarnertillu toqqammavigalugu atorfinitsinneqarsimasut.
Tusagassiuutit nukittunerulernissaat anguniarlugu, Siumut periusissiornissamik suliaqassaaq, ulluinnarni “medieforlig”-imik taaneqartartumik. Suliap siunertarissavaa, tusagassiuutit ataatsimut isigalugit qanoq atugassaqarnissaat ineriartornissaallu siunissami Inatsisartutigoortumik sinaakkuserneqarsimassammata.
Nunap aqqinik tammatsaaliuinissaq inuiattut ileqqunik oqaluttuarisaanerannillu tammatsaaliueqataavoq. Taamaattumik nunap aqqinik nalunaarsuineq qaammarsaanerlu sukumiisumik suliarineqartariaqarput.
Piorsarsimassutsikkut inuusaatsikkullu kalaallit oqaluttuarisaaneranni eriagisassat pingaaruteqartut najukkani ataasiakkaani katersugaasivinni, Nunatta Katersugaasiviani Allagaateqarfianilu, atuagaateqarfiillu allat aqqutigalugit tammatsaalineqassapput. Nunatsinni eriagisassanik misissuisinnaaneq periarfissagissaarnerussaaq. Nunatsinni eriagisassat ajornannginnerusumik periarfissaqarluni ilinniartunit atuartunillu misissorneqarsinnaalissapput. Toqqortat eriagisassat innuttaasunit takuneqarsinnaanissaat aammalu takornarissanit alutornartutut alakkarneqarsinnaanissaat periarfissaasariaqarpoq. Taamaattumik katersugaasivinnik pitsanngorsaanerit aamma annertusaanerit aallunneqartariaqarput.
Eqqumiitsuliortut, sanaluttartut, atuakkiortut nipilersortartullu suliaminnut atatillugu pikkorissartinneqartassapput, suliaminnillu ingerlatsiffissaannik ineriartortitsisoqassalluni. Namminersorlutik Oqartussat Katuamut tapeeqataasarnerat aqqutigalugu annertunerusumik periarfissiisoqassaaq sinerissamut Katuap aaqqissugaanik siammarterisarnissaq.
Nunani avannarlermiut naggueqativullu annertunerusumik kulturikkut suleqatiginerussavagut.
Nuummi kalaallisut oqaatsitta nukittorsarnissaat avaqqunneqarsinnaajunnaarpoq. Taamaattumik immikkut iliuuseqarluni oqaatsitta tammatsaaliornissaat suleqatigiissutigineqassaaq.
Eqqumiitsuliorneq, isiginnaartitsineq, nipilersorneq, erinarsorneq timersornerlu meeqqerivinni, meeqqat atuarfiini ilinniarfinnilu allani pingaartillugit ilinniartitsissutigineqartassapput.
Filmiliornerup nunatsinni ineriartornera annertusaavigineqartariaqarpoq, tamanna ilaatigut Filminstitutiliornikkut anguniarneqassaaq.
Atuakkiortut atuakkiaannik naqiterisarneq annertunerusumik nunatsinni naqiterneqartarnissaat Siumup sulissutigissavaa.
Inuiattut ileqqutoqqagut tammatsaaliniarlugit piniakkanik killilersukkanik agguaassisarnermi immikkut inuiattut piniariaasitoqaq atorlugu piniartunut pisassiisarnissaq eqqunneqartariaqarpoq.