Nunatsinni tunisassiorneq nunat tamalaat akornanni unammillersinnaasariaqarpoq sapinngisarlu naapertorlugu “akilersinnaasuni” aningaasartuutitigut atugassaqartinneqartariaqarluni.
Kalaallit Nunaanni sineriassorluni aalisarnikkut tunitsiviit inerisaavigineqartuassapput avammut nioqqutissiornermi unammillersinnaassuseqarnissaat qulakkeerniarlugu, kiisalu nunatta iluani nioqqutissiornikkut immitsinnut pilersornerulernissamik anguniagaqarnitsinni piviusunngortitsiviusumik naammassisaqartarnissaq anguneqarsinnaaqqullugu.
Taamaattoq Siumup ilisimalluinnarpaa nunatsinni isorartuumi tunisassiorfeqartoq avatangiiserput aallaavigalugu tamakkiisumik inersaaffiusimanngitsunik. Taamaattumillu Siumup pingaartippaa sumiiffinni innuttaasut suleqatigalugit ataavarnerusumik tunitsivigineqalersinnaanissaat aqqutissiuutissallugu.
Aalisakkanik tunisassiornerit naleqarnerulersitsiviusumik ingerlanneqartassapput, tunisassiarineqartut suulluunniit suliarereerlugit pisiniarfinni pisiarineqariaannanngortarnissaat siunertaralugu.
Illoqarfinni nunaqarfinnilu tunisassiorfeqartuni tamani tunisassiornermut ataatsimiitsitaliaqartarneq Siumup nutaamik aallarteqqissavaa, taamaaliornikkut aalisartut, sulisartut atuisartullu suliassanut pilersaarusiortarnermi peqataatittuarnissaat qulakkeerumallugu.
Suliffissuaaqqat puttasut sumiiffinni tunisassiorfeqanngitsuni, tunisassiorfinniillu avinngarusimaffiusuni pisariinnerusumik periarfissinneqartarnissaat suliarineqassaaq.
Nunap immikkoortuini tamani sinerissap avataani aalisakkat pisassiissutigineqartartut anneruleraluttuinnartumik nunami tunisassiorfinnut tulaanneqartalernissaannik suliareqqiisoqartarnissaanillu piumasaqaateqarluni pisassiissutit tunniunneqartarnissaat, periarfissaqarfiusuni tamani Siumup anguniarpaa, taamak iliornikkut nunami tunisassiorfiit ingerlalluartut, suliffissaqartitsilluartut avammullu tunisassianik naleqarnerulersitsilluartut tapersersorumallugit.
Kalaallit Nunatsinni nunap immikkoortuini aalisakkanik qalerualinnillu tunisassiornermi kisermaassisoqartassanngilaq, unammilleqatigiissitsineq nunap immikkoortuini tamani atorneqartassaaq.
Aalisakkanik tulaassisussaatitaaneq naapertuilluarnerusumik oqimaaqatigiinnerusumillu sinerissap qanittuani aalisartunut avataasiortunullu aaqqissuunneqartariaqarpoq, nunami naleqarnerulersitsisarneq annikillitinngikkaluarlugu.