Nunanik allanik niueqateqarnerup annertusartuarnissaa Siumup pingaartippaa, taamaammat nunat aalisakkanik avammut niuernitsinni suleqatigilluakkatta niueqatigiinnikkut suleqatigilluartarnissaat pingaartinneqassaaq. Nunat sanilitta niueqatigiinnikkut suleqatiginerat annertusarneqassaaq, niuernermi aningaasartuutit appasinnerpaaffimmiitinnissaat ilanngullugu siunertaralugu. Siumup kissaatigaa nunanik sanilerisatsinnik ullumikkornit annertunerusumik suleqatigiinnerit inerisarneqassasut. USA, Canada Island tassaapput nunat qaninnerpaatut sanilerisavut, tamannalu anguniarlugu Siumup sulinini nangissavaa. Ukiorpassuarni imaatigut aqqutit kangimut kisimik sammiveqartut qimallugit pilersuineq niueqatigiinnerlu nunanut qaniginerusatsinnut inerisarlugit sulissasugut Siumut isumaqarpoq.
Niuerneq eqqarsaatigalugu nunat suleqatigisatta nunattalu pisariaqartitaat tunniussinnaasaallu aallaavigalugit sulisutigut paarlaasseqatigiittarnissat anguniarnissaat Siumup pingaartippaa.
Nunatta EU-llu aalisarnikkut niuernikkullu isumaqatigiissuteqartarnerat nutarterneqartuassaaq, ukiunilu tulliuttuni nunatta EU-mik minguitsumik nukissiorneq aatsitassarsiornerlu pillugit suleqateqarnera suleqatigiinnissamut isumaqatigiissuteqarfiusumik ineriartortinneqarneqarnissaa Siumup piviusunngortissavaa .
Imminut pilersornerunissaq qulakkeerumallugu avataaniit eqqussukkat, nunatsinni tunisassiarineqareersunut unammillertut, akitsuusersorneqartarnissaat ammaffigissavarput, nunatsinni nioqqutissiorneq illersorumallugu annertusarumallugulu.
Nunat allat ilaasa nioqqutissaatitsinnik ataasiakkaanik eqqusseqqusinnginneri akitsuutitigulluunniit killilersimaarinninnerat eqqarsaatigalugit nunat pineqartut Naalakkersuinikkut aallartitaqarnikkullu oqaloqatigisarnissaat pisariaqarpoq, killilersimaarinninnerit aaqqiivigineqarnissaat siunertaralugu.
Nilammik imermillu unammilleqatigiiffiusumik nioqqutissiornerit taakkunanngalu niuerutiginninnerit piaartumik annertusaavigineqassapput, taamaaliornissamullu akornutaasinnaasut aporfiusinnaasullu qulaajarneqassallutik. Imeq pisuussuterput nunatsinnut aningaasarsiutaanerunissaa Siumup aqqutissiuutissavaa.
Nuummi Talittarfissuaq atorluarlugu avammut niuernitta nunanut niuerfiusunut toqqaannarnerusumik ingerlaalernissaa nunatsinnut iluanaarnarnerusumik ingerlalernissaa piaartumik suliarineqassaaq. Tamatumani Islandi aqqutigalugu assartuisitsisarnerup nunatsinnut iluanaarutaasumik ingerlanneqarnersoq misissortariaqarpoq, siunertarineqartutut Amerikkami Avannarlermi niuernikkut suleqatigiinnermi ineriartortitsisoqannginnera aamma sumik patsiseqarnersoq misissoqqissaarneqassasoq Siumup aqqutissiuutissavaa.
Kalaallit kulturitta avammut tuniniarnerunissaa nittarsaannerunissaalu siunertaralugu qanoq iliuusissatut tunaartassat pilersinneqarnissaat Siumup peqqissaartumik sulissutigissavaa, tamatumunnga ilaatillugu nunatsinni nammineerluta filmiliortarnitta annertusarneqarnissaa.
Nunatsinni niueqatigiinneq
Pisortat namminersortullu suliffeqarfiisa akornanni niuernikkut periarfissat oqilisaavigineqartuassapput, soorlu assartuinermi akit, akitsuutit, akileraarutillu tungaasigut aaqqissuussinerit naleqqussartuarnerisigut.
Nioqqutissanik pilersorneqarnermi sumiiffinni assigiinngitsuni pilersuineq isumannaallisarneqassaaq, kiisalu akit sumiiffinni aamma sikusartuni inuuniarnermi nammakkuminarnerusunngornissaat siunertaralugu nutaamik aaqqissuussisoqassalluni, pingaartumik inuussutissat peqqinnartut tunisassiallu nunatsinneersut eqqarsaatigalugit.
Nunatta iluani nioqqutissiat suulluunniit Nunatsinni atuisartunit, suliffeqarfinnit minnerunngitsumillu Pisortat suliffeqarfiutaanni tamani, ersarissumik piginnittut siunnerfiliinerisigut, nioqqutissiat taakku atorluarneqarnissaat qulakkeerneqassaaq.