Suliffeqarneq akulerutsitsinerlu

Innuttaasut tamarmik naleqquttumik suliffissaqarnissaat qulakkeerneqassaaq. Nunatsinni kalaallit najugaqartut salliutinneqassapput, piginnaasanillu ineriartortitsineq suliffissanik nutaanik pilersitsiviussaaq.

Siumup anguniarpaa innuttaasut tamarmik naleqquttumik suliffissaqarnissaat. Suliffeqarfiit, kommunit ilinniarfiillu suleqatigalugit suliffinnut tunngatillugu piginnaasanik naleqquttunik innuttaasunut ineriartortitsinissaq periarfissiissutaasaaq – inuussutissarsiutit pioreersut nutaallu ilanngullugit.

Avataaniit sulissussanik pisariaqartitsineq annikillisarneqassaaq, nunamilu maani najugaqartut suliffinnut salliunneqarlutik atorfinitsinneqartarnissaat qulakkeerneqassaaq. Kommunini suliffissarsiortunik sullissineq pitsanngorsarneqartuassaaq.

Akissaasersuinerlulluni sulisitsineq inerteqqutaassaaq, inatsisillu atuuttut misissorneqarlutik naapertuutinngitsut iliuuseqarfigineqassapput. Suliffissarsiortut nittartakkatigut nalunaarsuisarnissaat pisussaaffiussaaq. Tikisitsisarnermi akissuteqarfissamut piffissaliussaq ullunik 14-init sapaatit akunnerinut sisamanut sivitsorneqassaaq.

Inuusuttut ilinniagaqarnatilluunniit sulinngitsut aallartinnissaanut ikiorniarlugit immikkut iliuuseqarfigineqassapput, aamma meeqqat atuarfianiit ingerlaqqittarneq qulakkeerniarlugu sutigut tamatigut iliuuseqartoqassaaq. Suliffissaaleqisut piginnaasat naapertorlugit ilinniaqqinnissamut suliffissamulluunniit neqeroorfigineqassapput.

Suliffeqarfiit pisortat pigisaat pinngitsooratik nunatsinni qullersaqarfeqarlutillu aqutsisoqarfeqassapput. Pisortat kalaaliussapput. Suliffeqarfiit nutaaliornissamut, naleqqussarnissamut teknologiimillu ineriartortitsinissamut siuarsaaqqullugit siulersuisoqarnikkut siulersorneqassapput.

Akulerutsitsineq inuiaqatigiinni peqataatitsinermik tunngaveqassaaq. Siumut oqaatsitigut inuiaqatigiinnilu peqataalersitsinissamut inatsimmik ineriartortitsiuassaaq. Kalaallit Nunaanni najugaqartunut oqaatsinik (kalaallisut, tuluttut, danskisut) kiisalu kulturerput pillugit ilinniarnissamut periarfissaqartitsisoqassaaq.

Nunat allaneersut nunatsinni najugaqarsinnaanerat pillugu namminerisamik inatsisiliortoqassaaq. Sulisussanik tikisitsineq pisinnaassaaq, najugaqarfiillu akornanni immikkut qinnuteqaammik aammaarluni tunniussinngikkaluarluni nuttarnissaq periarfissaassaaq.