Nunarsuarmioqataaneq

Nunarput nunarsuarmioqataassaaq – suleqatigiinnermik, ilinniartitaanermik, kulturimik niuernermillu tunngaveqartumik. Piginnaasanik nukittorsaaneq suliffeqarfiillu ikorfartorneqarnerat qulakkeerneqassaaq.

Nunarsuarmioqataanerup sorlaa tassaavoq – niuernikkut, sulisoqarnikkut, ilinniartitaanikkut, kulturikkut aningaasarsiornikkullu paarlagiaaqatigiinneq, tamannalu nunat assigiinngitsut akornanni aningaasaqarnikkut eqaatsumik ataatsimoorussiartuinnarneq ilutigalugu eqqumaffigineqarluni ingerlanneqassaaq. Paarlagiaaqatigiinneq siunissami tunngaviujartuinnarnissaa pingaaruteqariartuinnarnissaalu naatsorsuutigisariaqarparput.

Nunarsuarmioqataanerup unamminartuujuarnissaa aningaasaqarnikkullu assigiinngitsutigut eqquisinnaanera eqqumaffigalugu eqeersimaartumik ingerlatsisoqassaaq. Taamaammat aqqutissat pingaartut ilagaat, sulisut piginnaanngorsartuarnissaat suliffeqarfiillu annerusumik aningaasanik kaaviiaartitsisinnaanissaat ikorfartussallugu.

Taamaammat Siumup nunarsuarmioqataaneq pillugu suleriaasissatut pilersaarummik suliaqarnissaq pingaartippaa, taamatut iliornikkut nunatta soqutigisai aallaavigalugit aqqutissat pilersinneqassammata.