Asasakka nunaqqatikka.
Ukioq 2023-imi assigiinngitsorpassuarnik pisoqarsimaqisoq maanna naavoq oqaluttuaannanngorlunilu, ukiorlu nutaaq nammineq qanoq ilusilersussanerlutigu aaliangigassarput aallartipparput.
All.: Erik Jensen, Siulittaasoq
Ukioq 2023-imi Qasigiannguani nuannerluinnartumik puiunaatsumik Siumut ataatsimeersuarmat, siulersuisuunerit aammalu anguniakkat nutarterneqarput. Ataatsimeersuarnermi nuannersut ilagaat ataqqinaammik ilaasortaasoq Lars-Emil Johansenip saniatigut nutaanik ataqqinaammik ilaasortanngortitsineq. Tassaasut: Pavia Nielsen, Uummannaq aammalu Ruth Heilmann, Maniitsoq.
Aasaq Qasigiannguani ataatsimeersuarnermi peqataasunut tamanut aammalu aaqqissuisunut uummammik pisumik qujanarujussuaq!
Siumup siulittaasuatut neriuutigeqaara aammalu angorusutama annerpaat ilagivaat aningaasarsiornikkut ineriartornissarput. Ukiorpassuarnimi oqallisigiuarpagut anguniarlugillu suliuarsimavugut aningaasarsiornikkut siuariartortariaqarnerput aammalu naalagaaffinngornissamik anguniagaqarneq. Pisutsilli piviusumik sumut ingerlappat? Pissutsillu allanngussappata kikkut allannguisuussappat? Tamatta!
Ajornannginnerpaajujuaannarpoq politikkerit tikkuartussallugit, ajornarnerpaajusarlunilu imminut tikkuarnissaq. Taamaattumik tamatta immitsinnut piumaffiginissarput pisariaqarpoq, pissutsit allanngortissagutsigit. Minnerunngitsumillu aaliangigassani annertuunik aaliangiisinnaassuseq piusariaqarlunilu kiffaanngissuseq naalagaaffinngornissattalu qanillinerunissaanut alloriarniarnermi.
Nutaanimmi aningaasarsiorfissanik pilersitsinngikkutta imaluunniit inuiaqatigiinni akileraartarnikkut kivitseqataanngikkutta, asasagut meerartagut, ataqqinartut utoqqartagut, peqqinnissaqarfik allarpassuillu ilungersunarnerusumik atugaqartikkaluttuinnarnissaat aarlerinarsissammat. Tassungalu killinnginnissaq tamatta pisussaaffigaarput iliuuseqaqataaffigissallugu.
Ukioq aggersoq allannguinissamut neriuuteqartitsivoq minnerunngitsumik tamatta ajunnginnerusumik atugaqalernissarput siunertaralugu sulineq Siumup nangillugu ingerlakkusummagu. Isumaqarpunga tamatta pinngitsoqarata periarfissap atorluarnissaanut pisussaaffeqarlutalu suleqatigiilluartarnerput atorlugu anguniagaqaqatigiinnerput ukiumi nutaami nangissagipput.
Nunarput imaanaanngitsunik uatsinnut nunarsuarmioqatitsinnullu tunniussassaqarpoq, pisuussutinimmi atorluagassatsinnik amigaateqanngikkaluaqaagut. Taakku atorluarnissaat uatsinnullu iluaqutaatilernissaat Siumup sulinermini qitiutittuartarsimavai, aningaasarsiornikkullu inissisimaffipput isigissagaanni aatsaat taamak tamanna tigussaasumik iliuuseqarfigissallugu pisariaqalersimatigisoq isumaqarpunga.
Nunarput assissaqarani kusanaqisoq aamma aningaasarsiornikkut periarfissarpassuaqartoq, ulloq manna tikillugu naammattumik iluaqutigilersimanngisatsinnik iliuuseqarfigisariaqarparput. Uagut kisitta pinnata aammali kinguaassagut pillugit ineriartortitsineq annerusoq aallartissallugu pisussaaffeqarpugut, ataasinnaanerusumik akisussaaffeqartumik aningaasarsiornitta aaqqissuunissaata ilusilersornissaa eqqarsaatigalugu aamma innuttaasut tamatta siumukariartornissarput aqqutissiuukkumallutigu.
Ukiuni tulliuttuni Siumup sulissutigissavaa Nunarput ataatsimut isigalugu aningaasarsiornikkut ineriartorfiusoq. Suliniutit suliffissanik pilersitsisussat salliullugit aallutissavagut aamma nutaaliortortatta ajunngitsumik atugassaqartinneqarnissaat ilanngullugit. Suliffeqarfiit mikinerit, aallartitsiniartut sumiiffimmilu suliffinnik pilersitsiortornissat avaqqunneqarsinnaanngitsut isumaqarpunga. Taamaaliorutta aningaasarsiornitta patajaannerusumik assigiinngisitaarnerusumillu ingerlalernissaa anguneqarsinnaammat.
Pisarnitsitut aalisarneq nunattalu pisuussutaanik inuussutissarsiuteqarneq ineriartorteqqissallugu Siumut piumassuseqarpoq. Naatsorsuutigaara ukiumi nutaammi aalisarneq pillugu inatsit nutaaq naammassineqassasoq, tamatumanilu Siumup ilaatigut anguniarpaa sinerissap qanittuani aalisartut aningaasarsiornikkut sakkortuumik pituttorneqarsimanerisa atorunnaarsikkiartuaarneqarnissaa. Imartavut pisuussutinik qalaarput atorluarnerusariaqakkatsinnik. Taakku toqqaannaq aalisartut aningaasarsiornikkut ineriartornissaanut iluaqutaanerulernissaat aqqutissiuutissallugu pisussaaffeqartugut isumaqarpunga, aamma nunasiaataasimanermiit aningaasarsiornikkut aaqqissuussisimaneq suli arlalitsigut allanngortinnagu ingerlatarput tamaanga killittariaqartoq isumaqarpunga.
Takornarialerineq ilanngulluni suli ineriartorfissaqarluaqaaq. Immikkuullarissumik nunaqarnerput inuusaaseqarnerpullu nittarsaatissallugu suliniuteqarneq nukittorsaqqissavarput, uagut maani nunaqartut qitiutilluta. Takornarialerineq siuarsassallugu Siumut siuttooqataassaaq, tassungalu tunngatillugu inatsisissaq nutaaq suliarineqaleruttorpoq. Suliffiit nutaat pilersinneqarnissaat siunertaavoq sumiiffinni inuppassuarnut piumasunullu periarfissiisussaq.
Nukissaqarniarneq eqqarsaatigalugu attassinnaasumik ineriartortitsineq nangillugu ingerlanneqassaaq, soorlu erngup nukinga atorlugu iluaqutissarpassuit ineriartortinnerisigut, anorip iluaqutigilernissaa ilanngullugu pilersaarusiorluguttaaq. Atasinnaasumik suliniutit tamakku avatangiisitsinnut iluaqutaaginnaratik aamma aningaasarsiornikkut periarfissarpassuarnik ammaassisinnaasut qularutiginngilara, minnerunngitsumik avammut niuernitsinnut iluaqutissartai ilanngullugit.
Ukiuni tulliuttuni sulisutut inissisimasugut tamatta pikkorissartuarneqarnissatsinnik ingerlatsinissarput pingaartutut isigaara, tamannalu Siumup siuttuuffigissallugu piareersimaffigaa. Pisussaaffeqarpugut innuttaasut kalaaleqatigut ilinniaqqinnermikkut pikkorissusermikkullu ilisimasaqarluarnermillu pigisaqarnerulernissaanut aqqutissiuussissalluta, tamannalu siunissami aningaasarsiornikkut tamakkiisumik peqataatitsiumagaanni avaqqunneqarsinnaanngitsoq isumaqarpunga.
Ilinniarneq inuussutissarsiutinillu inerisaaneq annertunerusumik ataavartumillu aningaasaliiffiginerisigut tamatta aqagussamut piareersarnissatsinnut periarfississaagut. Tamanna suliffeqarfiit assigiinngitsut pilersinneqarsinnaanissaanut tunngaannarani aamma aningaasarsiornitta assigiinngiiaarnerulernissaanut tunngavoq.
Ukiumut nutaamut ikaarsaarnitsinni eqqaamasigu aningaasarsiornikkut ineriartornissaq atugarissaarnerunissatsinnut tunngaannarani aamma innuttaasuusugut tamatta inuulluarnerunissatsinnut tunngammata. Tamakku ilaqutariinnut, meerartatsinnut, meeqqerivinnut, atuarfinnut allatigullu ataatsimoorullugit ingerlatatsinnut tamanut tunngapput.
Qanortoq ukioq nutaaq taamak siunertaqarnitsinnut takutitsiffiugili – aalajaassuseqarnitsinnut siumukarusussuseqarnitsinnullu. Ataatsimoorutta Nunarput pigissaarnerusoq pilersissavarput, tamatta ataatsimut iliuuseqarsimanitta kingunissaanik peqarluarfiusoq.
Tamassi ukiortaami pilluaritsi, qanortoq ukioq nutaaq neriuummik siuariarnermik peqqinnermillu tamanut atugaqarfiugili.