Maanna ilisimalerparput KNAPK ukiuni kingullerni ileqqorilersimasani malillugu aammaarluni suliassaminik naammassisaqarsimanngitsoq. Akuerineqarsinnaanngilaq piniartut ameerniarnermik isumalluutillit sumiginnarneqarmata
All.: Lars Poulsen, Inatsisartunut ilaasortaq, Siumut
Ukiut kingulliit ataqqinartut aalisartut piniartullu kattuffianni siuttut ajoraluartumik maalaarujoortutut inuillu attaveqaqatigiittarfiini akisussaaffimminnik eqqaassutut ilisimanerulersimavagut.
Tamanna pingaartumik aalisakkat akiinut isumaqatiginninniarsinnaassuseqannginnerannut tunngasartoq tusartarparput, kingullertigut saarullinnut akigitinneqartunut aaqqiissuteqarnissaq allanut ilanngullugu igeriunniarsarisaraat nipiliutigineqartoq tusarsaasaqaluni.
Piniartunulli taamaallaat ameerniarnermik isumalluuteqartunut KNAPK-p suliassaminik naammassisaqarsinnaasimanngitsutut inissisimarpalunnera kiisami akuerineqarsinnaanngilluinnartoq isumaqarpunga.
Piaarnerpaamik aaqqinneqanngippat Naalakkersuisut erngertumik aaqqiissuteqarniarlutik akuliuttariaqartut isumaqarpunga. Aningaasanut inatsit Inatsisartut akuersissutigereerpaat, tupinnarporlu aalisartut piniartullu sullissisui pisussaaffimminnik naammassisaqarsinnaanngippata. KNAPK-mi pissutsit akisussaaffeqanngitsutullu ileqqulersuuteqarpalunnerit ilumut naammatsiffiginarsipput.
Sukannersumik kaammattuutigissavara piaartumik KNAPK GG-mut ammit akii pillugit isumaqatiginninniaqqullugu. Taamattaaq ukioq aallartittoq atorlugu upernaamut arnarluit suaannik suanniarnerup aallarteqqinnissaanut aalisartut eqqarsaatigalugit suliassaasut piareersarfigalugit aallarteqqullugit maannangaaq piumasaqarnissaq inissaminiittoq isumaqarpunga.