Tasiilami meeqqat atuarfiani ilinniartitsisussaaleqineq akissutissarsiuunniarlugu, Inatsisartut Ilinniartitaanermut Ataatsimiititaliaani qaqinneqassasoq siunnersuutigaara. Suliamik kommunini qinikkat naammassinnissinnaanngippata qitiusumit akuliuttoqartariaqarpoq
All.: Doris J. Jensen, Inatsisartunut ilaasortaq ataatsimiititaliamilu ilaasortaq, Siumut
Piffissami kingullermi Tasiilami ilinniarsimasunik 22-nik ilinniartitsisussaaleqineq saqqummiunneqarpoq. Ajornartorsiut tusagassiuutitigut tusarliunneqartoq pillugu ilungersunarluinnartutut Siumumi isumaqarfigaarput.
Ilisimavarput atuarfiit ingerlanneqarnerat atorfinitsitsisarnerlu kommunit akisussaaffiisa ataanniittoq. Taamaakkaluartoq Namminersorlutik Oqartussat tungaannit nakkutiginninneq pisussaaffiuvoq aamma Nunat tamalaat akornanni meeqqat pisinnaatitaaffianniippoq meerartatta atuartussaatitaanerat. Tamanna qulakkeerniarlugu kommunini qinikkat pisortallu naammassinnissinnaanngippata qitiusumit akuliuttoqartariaqarpoq.
Ajornartorsiutip iternga tikissagaanni peqqutaasut arlalissuusinnaapput: ilinniartitsisut tunumeersuunngitsut misigisaminnik artorsarnerat, ilinniartitsisut misigissutsikkut oqilisaanneqartannginnerat, atugassarititaasunik iluarinninnginnerat aammali ajornartorsiutit ilagisinnaavaat atuarfimmi aqutsisoqarnikkut ajornartorsiuteqarneq.
Taamaattumik meeqqat qitiutillugit aaqqiiniarnissaq anguniarlugu, qulequttap Inatsisartut atuartitaanermut ataatsimiititaliaanni piaartumik qaqinneqarnissaa ilaasortatut siunnersuutigaara.