Siumup siulittaasuata, Erik Jensenip, sulisartut ulluanni SIK-p nalliussinerani oqalugiaataa.
Siullermik Siumut sinnerlugu sulisartut ulluanni tamassi pilluangaaritsi – qujanarlu oqaaseqarnissannut maannga aggersarneqarsimagama.
Siumup politikikkut suliniaqatigiiffittut tunngavimmisut isigai, inuiaqatigiit ataqatigiissut, ilatsiinnartuunngitsut, eqeersimaartut, imminullu napatinnissaminnut ingerlanissaannut aqqutissiuuteqataaffigissallugit.
Minnerunngitsumik Nunatsinni inuiaqatigiit aningaasaqarnikkut politikikkullu nammineersut ilungersuutigiuarsimavagut, taamaammallu Inuiattut namminersulernissaq pingaartutut isigaarput.
Tamannali pisinnaanngilaq tamatta suleqataanngikkutta. Taamaattumik suliffissaqarneq inuttut ataasiakkaattut kiffaanngissuseqarnermut tunngatittarparput. Kiffaanngissuseq tamatta qanami pigisaraarput.
Kiffaanngissuserlu anguneqassappat inuttut aammali nunatut sulisariaqarpugut. Kiffaanngissusermi nammineq pilersinneqarsinnaanngimmat, uagulli sulinitsigut pilersitassaralutigu. Innuttaasoq kinaluunniit aalajangeeqataasinnaassaaq, nammineq ulluinnarni inuunerminut inuiaqatigiillu sutigut tamatigut aaqqissugaanerannut. Tamatumanilu innuttaasut tamarluinnatta atorfissaqartinneqarpugut.
Kiffaanngissuseqarnissamullu aamma atalluinnarpoq kikkut tamarmik suliffissaqarnissaat. Nunatsinnilu aningaasaqarnikkut naapertuilluartumik ingerlatsineq kikkullu tamarmik inuiaqatigiit ajunngitsorsiassaannut naligiimmik periarfissaqartitaanissaat ilanngullugu.
Siumut nutaaq ulluni makkunani aallartisaleruttorpoq. Sulinissamilu tassani kissaatigisatta ilagaat, Sulinermik Inuussutissarsiuteqartut Kattuffiat aamma Siumut, politikikkut suliniaqatigiiffittut, qaninnerusumik ulluinnarsiutigalugu suleqatigiinnerussasugut.
Siumut partiini tamanit kisiartaalluta siorna Ilulissani 1. aamma 2. september SIK ataatsimeersuarnerani peqataavugut, uagut timitalimmik suleqatigiinnerup pitsaasuunissaanut aqqutissiuussillutalu ilungersuuteqaratta, oqarluartaarnerinnaallu aallaavigalugit suleqatigiinnerit pitsaasut pilersinnagit, kisiannili sulisartoqarnikkut aaqqiissutissat kattuffiup qanimut suleqatigineratigut piviusunngortitseqataarusukkatta.
Siumup politikikkut suliniaqatigiiffittut sulisartut kikkulluunniit sumiikkaluartulluunniit inuussutissarsiortullu – aamma aalisartut piniartullu, sorlaqarfigai.
Siumut nutaaq taamak tunngaveqarluni ingerlaqqissaaq, neriuppungalu SIK siunissarput pillugu sulinissatsinnut qanimut suleqatigisinnaajumaaripput.
Immitsinnummi pisariaqartippugut, suleqatigiissutissaqaqalutalu. Uagut pillutaanngitsoq, kisiannili nunarput inuilu pillugit.
Taamak naatsumik oqaaseqarlunga sulisartut tamaasa qamannga pisumik ullorsiorneranni – Siumut sinnerlugu – pilluaqqungaarpakka.
Qujanaq.