Siumut inuiaat nunarpullu pillugit sulivoq. Folketingimullu Siumut qinigaatitaqarpat, qinersisartut sinnerlugit piumasaqaatillu ersarissut tunngavigalugit sulineq ingerlanneqassaaq
All.: Erik Jensen, Siumup siulittaasua
Folketingimut qineqqusaarneq naammassiartulerpoq, Siumullu erseqqissumik qinersisartunut oqariartuutigai, folketingimi Socialdemokratit suleqatigineqarnerat nanginneqassasoq sunillu tunngaveqarnersoq.
Suleqateqarneq ataatsimilluunniit inuiaat nunarpullu pillugit nalornissuteqarnermik tunngaveqanngitsoq. Inuiaqatigiimmi ilisimalluarpaat Siumut Folketingimi sulinermi ersarinnerpaamik inuiaat nunarpullu sinnerlugit qununani iluareqqusaaranilu suliuarsimasoq.
Siumumilu isumaqarpugut qinersisartut partiinit allanit nalornisinniarneqarnerat aamma kikkunnik suleqateqarniarnermik oqarnaveersaarnerat pitsaasuunngitsoq. Politikimi sunniuteqarnerpaalluni inississagaanni suleqateqarsinnaaneq pingaarutilerujussuuvoq. Ataatsimiittarfiit iluani peqataaneq sunniuteqarsinnaanerpaarlu perusullugu Siumup suleqatissatut toqqarpaa partii nunatsinnut ukiuni kingullerni pitsaalluinnartumik sulisoq. Neriuppugut qinersisartut nalorninngitsunik suleqateqarsinnaasunik aamma sunniuteqarnerpaajusinnaasunik qinersiumaartut.
Socialdemokratinulli suleqateqarneq isumaqanngilaq nunarput pillugu piumasaqarata tamanna ingerlassasoq. Suli suliassarpassuaqarpugut, minnerunngitsumik kalaaleqativut Danmarkimi nunasisimasut pisinnaatitaaffiisa illersorneqarnissaat pillugit.
Taamaattumik Folketingimi Siumup piumasaqaatissai tunaartarisaalu attanneqarput, Danmarkimilu naalakkersuisunngortitsinissamut Siumut oqartussaaffeqassaguni, avaqqunneqarsinnaajunaarlugit inissinneqassapput:
- Nunasiaataasimanerup kingunipilui naalagaaffiullu iliuuserisimasai ilungersunartut iliuuseqarfiginerat naammassineqassasoq.
- Nunatsinni inatsisitigut illersugaaneq ingerlatsinerlu sumiiffinni tamani assigiimmik atugassaqarfiussasoq.
- Sumi inunngorsimaneq tunngavigalugu assigiinngisitsineq unilluinnassasoq.
- Namminersorneq pillugu Inatsit qinigaaffimmi tulliuttumi naammassiniarlugu Folketingimiittaaq ilaasortanit suleqataaffigineqassasoq.
- Kalaaleqativut Danmarkimi najugallit sutigut tamatigut immikkoortinneqaratik pisinnaatitaaffeqarnerat naqissuserneqassasoq.
- Europami sorsunnerup kingunerisanik aningaasaqarnikkut ingerlatsinerput inuussutissanillu pisariaqartutigut pilersorneqarneq patajaatsuussasoq.