Politikkikkut suliniutit killiffissiorlugit periusissallu aaqqissuullugit Qooqquni naapeqatigiittoqalerpoq
Inatsisartut ukiaanerani ataatsimiinnissaanut atatillugu alloriarnissat tullinnguuttut pillugit Siumut isumasioqatigiissitsilerpoq. Nuna tamakkerlugu Inatsisartuni qinikkat, kommunini gruppini siulittaasut, folketingimi ilaasortaq, borgmesteri siulersuisuunerillu iliuusissat pillugit isumasioqatigiinnissamut aggersarneqarsimapput.
Pisussaq Nuup eqqaani Qooqquni ingerlanneqassaaq ulluni 18. – 21. septembari 2021.
Naapeqatigiinnermi politikkikkut suliniutit killiffissiorneqassapput, anguniakkat aamma kommunit killiffii eqqartorneqassapput kiisalu alloriaqqinnissat tullinnguuttut pingaarnersiorneqassapput.
Siulittaasoq Erik Jensen oqarpoq, Siumup qangaaniilli ammasumik oqaloqatigiinneq ileqqorisarsimasaa maanna aallarteqqinneqalersoq.
– Politikkikkut suliniaqatigiiffittut qangaaniilli ilisarnaatigisimavarput, peqatigiinneq atorlugu politikkikkut ineriartortitsineq ingerlattarsimagatsigu. Periuseq taanna maanna aallarteqqinneqassasoq kissaatigisimavara, unalu pisussaq siulliugallartussaassaaq, Erik Jensen oqarpoq.
– Inuaqatigiit Siumup tunngaviinik nalornissuteqarunnaarsikkusuppagut. Aammalu pisussaq periusissanik tulleriiaarinerulluni ingerlanneqassaaq, ilaatigut ataatsimeersuarnerup anguniagassalersuisimanera toqqammavigalugu. Neriuutigaarput pissussaq tamatsinnut pissarsiffiussasoq, minnerunngitsumik Siumup iluani allorissaaqatigiinnerunissatsinnut iluaqutaalluarumaartoq, Erik Jensen oqarpoq.
Aaqqissuussisoq, Hans Peter Poulsen, neriuuteqarpoq ukiuni tulliuttuni pilersaarutinut illinissat nutaat qaqiffigissallugit.
– Siunnerfiit ersarissut, paatsoorneqarsinnaanngitsut isumaqatigiissutigineqarsimanissaat neriuutigaara. Taannalu tikitserlugu ikiuunnissara qilanaaraara, aamma tamanut angusaqarfiusumik nuannersumillu peqatigiinnissatta ingerlanissaa qularutiginngilara, Hans Peter Poulsen oqarpoq.