Aki-Matilda Høegh-Dam juullikkunni sulinngiffeqareerluni Folketingimi sulinini aallarteqqippaa. Suliassat pissanganartut takkussuupput.
Siumut Folketingimi allattoqarfiata allataa
Siumut Folketingimi juullikkunni sulinngiffeqareerluni sulineq aallartinneqarpoq.
Folketingimi ilaasortaq Aki-Matilda Høegh-Dam pissanganartunik suliaqarpoq, politikerinillu ataatsimeeqateqaqattaarluni.
Inuussutissarsiornermut ministerimik Morten Bødskovimik Aki-Matilda Høegh-Dam sisamanngornermi januaarip tallimaani ataatsimeeqateqarpoq. Tassani Ruslandimut Belarusimullu sukannersumik aaqqiisoqarnissaanik siunnertaqartumik ataatsimiittoqarpoq.
Aatsitassarsiornermut suliaqartunik Ironbark-imik aamma ataatsimeeqateqarpoq. Ironbark Nunatta avannaata kangiani Citronen Fjordimi zinkimik aqerlumillu piiaanissamik siunnertaqarpoq.
Aki-Matilda Høegh-Dam Kalaallit Nunaat pillugu ataatsimiititaliami siulittaasuuvoq, ukiunilu marlunni siulittaasuunermini susoqassanersoq maanna pilersaarusiuleruttorpoq. Ataatsimiititaliami ilaasortaasut qanoq ataatsimiititaliami sulinermi naatsorsuuteqassanersut maanna ataatsimeeqatigeqattaaleruttorpai.
Ataatsimiinnerpassuit saniatigut Europa parlamentimi ilaasortamik Bergur Løkke Rasmussenimik Venstremeersumik aamma ataatsimeeqateqarpoq. Tassani Kalaallit Nunaat pillugu sulinermi suut suleqatigiissutigineqarsinnaanersut eqqartorneqarput.
Folketingimi ilaasortanngorlaat nereqatigiinneranni Aki-Matilda Høegh-Dam aamma qaaqqusaavoq. Christiansborgip neriniartarfiani, Snapstingimi, nereqatigiinnermi peqataavoq, tassani Folketingimi ilaasortanngorlaat ilaasortanngoqqittullu naapisimaarpai.
Klima-, energi- aamma forsyningsministeri Lars Aagaard, Moderaterne, pingasunngormat ataatsimeeqatigaa. Silaannaap allanngoriartornerata kingunerisai Kalaallit Nunaannut Savalimmiunullu qanoq eqquisinnaanersut ataatsimeeqatigiinnermi eqqartorneqarput.
Nunatta kujataani Foodlab-imik pilersitsinissamik pilersaarusiortoq Salik Parbst Frederiksen kaffisoqatigiinnertalimmik ataatsimeeqatigaa, kiisalu sapaatip akunnerani matumani sulineq naggaserlugu Esbees nittartakkatigut ataatsimeeqatigalugit. Esbees dronit pillugit Kangerlussuarmi ataatsimiititsissaaq sappaatip akunnerani aggersumi.
Siumut Folketingimi ulapaartoqaqqissaaq sapaatip akunnera tulliani, ilaatigummi Folketingimi qinigaaffik aallarnerlugu ammaalluni oqallittoqassaaq.