Ukiuni kingullerni ukiup naalernerani imaatigut inuussutissarsiorneq inuppassuarnit nappatigineqartoq annertuumik akimmisaartinneqartarpoq. Ukiut aggersut suli peqqarniinnerusinnaapput
All.: Lars Poulsen, Inuussutissarsiornermut oqaaseqartartoq, Siumut
Silap allanngoriartornera ilutigalugu, naatsorsuutiginngisatsinnik anorersuarujussuit, imarlunneq atasuinnarmillu silarluk nalaanneqartalerput. Tamatuma kinguneraa aalisarnermik piniarnermullu inuussutissarsiuteqartut sakkortuumik eqqorneqartarmata. Akulikilligaluttuinnartumillu taamak nalaataqartarneq isiginnaalersimavarput.
Pissutsit kingunerisaanik sinerissap qanittuani aalisartunut piniartunullu aningaasaateqarfimmik pilersitsisoqartariaqartoq aammaarluta politikikkut suliaqartut akornitsinni eqqartorparput. Ukiuni kingullerni ukiup naalernerani imaatigut inuussutissarsiorneq inuppassuarnit nappatigineqartoq annertuumik akimmisaartinneqartarpoq, inuussutissarsiortullu akornannit piumasarineqartarpoq ikiorsiisoqassasoq.
Taamak pisoqartillugu Naalakkersuinikkut iliuuseqarnissamut periarfissat qularnaatsumik suli inissinneqarsimanngitsut maluginiarnartarpoq. Pineqartumut Inatsisartut ersarissumik inatsisiliorsimanngitsut ersertarpoq. Tamannalu pilersaarusiornikkut qaangerneqartariaqalersoq isumaqarpunga. Aningaasaateqarfik erseqqissunik malittarisassaliuunneqarpat, qaqugukkut Naalakkersuisut susassaqartut suleqatigalugit namminerisamik iliuuseqartalernissaat aqqutissiuunneqassaaq.
Taamaaliorutta Naalakkersuisut pisariinnerusumik aalajangiisinnaanngussapput, ajornartoorfimmi kaammattorneqarnissartik utaqqinngikkaluarlugu erngertumik iliuuseqarsinnaanngorlutik.
Ikioqatigiinneq
Inuussutissarsiut siulittuiffigiuminaatsoq eqqanaarsarlugu aallartittariaqarpugut. Kissaatigissavaralu Naalakkersuisoq susassaqartoq aalisartunut piniartunullu aningaasaateqarfimmik pilersitsisoqarnissaa siunertaralugu suliaqarluni aallartissasoq, Inatsisartuni oqaluuserineqartussamik.
Kissaatiginanngeqaarmi ukiup naalernerani assingusumik nalaataqassasugut. Pisoq ilinniarfigissagipput kissaatiginarpoq. Ukiuni aggersuni suli peqqarniinnerusinnaasuni sinerissap qanittuani imaatigut inuussutissarsiortut inissisimanerat peqatigiilluta nukittorsartariaqarparput.
Takorloorpara tunisinermut ilaliullugu aningaasaateqarfimmut nakkartitsisoqartassasoq, aningaasaateqarfillu taanna taamaallaat Naalakkersuisut nalilersuereerneratigut ikiorsiinermut atorneqartassasoq. Tamanna pisariaqarpoq, tassami piniartut aalisartullu aatsaat nunamiunngorlutik suliffissarsiortutullu nalunaarsorteqqaarlutik ikiorserneqarniaraluartarnerat qaangissagutsigu, immikkut ittumik iliuuseqartariaqassasugut tamatta takusinnaanngutsiarparput.
Takorluunngilara aningaasaateqarfik imaaliallaannarlugu ammarneqartassasoq. Tamatta pilinissatsinnut periarfissaqarpugut. Taamaakkaluartoq issersuup silarlunnersuullu nalaappaatigut, siku saappallaarpat silalu qaammatit arlerlugit unerisimanani, taava aningaasaateqarfik atuuffissaminut pisimasassaaq.