Inatsisartunut qineqqusaarnermi partiit arlallit sinerissap qanittuani qaleralinnianut akitsuutip peerneqarnissaa qineqqusaarutigaat. Siumut tamakkununnga ilaavoq, Siumumilu aalajangiusimavarput akileraarusersuineq peerneqartariaqartoq. Taama oqarpoq Siumup siulittaasua, Erik Jensen.
Naalakkersuisut aningaasanut inatsisissatut siunnersuutaat misissoraanni tupigusunnarsinnaavoq. Tassami partiip Naalakkersuisooqataasup Naleqqap naleqartitai ersinngilluinnarmata. Tupinnarnerullunili Naalakkersuisooqataasa akuerisaat Inatsisartuutitaasa maanna illuatungilerlugit saqqummermata.
Apererusunnarsivoq Naleqqap Naalakkersuisuutitai malinnaasimannginnersut imaluunniit sunaluunniit akuersaaginnarsimagaat, “issiavik kissalaartoq” uninngaffigiumallugu. Aningaasaqarnermummi Naalakkersuisup saqqummiussisarnermini tamatigut oqaatigisarmagu Naalakkersuisooqatigiit isumaqatigiittut aningaasanut inatsisissatut siunnersuut saqqummiukkaat.
Taamaattoq Siumumiik oqaatigissavarput uagut qineqqusaarnermi oqaatigisimasagut aammalu neriorsuutigisimasagut timitalernissaat ingerlattaratsigit, qanorluunniit aaliangigassat annertutigigaluaraangata – qimaaneq ajoratta. Unneqqarissuseq tatiginassuserlu oqaasiinnaassanngimmata illuanili qinersisartunut neriorsuutit attannissaat pingaartikkatsigu.
Siumut ukiorpassuarni naalakkersuinikkut siuttuulluni inissisimasarsimavoq, pingaartittuarneqartarsimavorlu naalakkersuinikkut ingerlatsineq tatiginartumik ingerlanneqassasoq, aamma eqqortumik innuttaasunut pissuseqarluni pissaanermik tigummiartoqassasoq. Taamaattumik tunngaviusumik pisussaaffiuvoq, qineqqusaarnermi aaqqitassatut innuttaasut oqariartuutigisimasaat naapeqatigiiffissarsiornissaat. Tamannalu Naalakkersuisut suliassaraat naammassisassaq.