Naalakkersuisut iliuusissamik erseqqinnerusumik saqqummiussaqarnissaat kissaatigaara. Tamanna sukkanerpaamik pisariaqarpoq. Qanitavut allallumi suli akiuussuserneqarsimanngitsut qanoq illersussanerivut paasissallugu tamatta pisariaqartipparput
All.: Lars Poulsen, Inatsisartunut ilaasortaq
Naalakkersuisut ulluni kingullerni oqariartuutigisaqattaarpaat, inuiaqatigiinni tamatta corona pillugu akisussaaffimmik tigusissasugut. ‘Inooqatigissagippunngooq’, tamanna ima paasisaqarunarluni, coronavirusi akunnitsinniittoq sungiutissagipput.
Tamanna paasisinnaavara. Kisianni corona aallartimmalli akisussaaffik innuttaasugut tamatta tigoreerparput, tamatta pinaveersaartitsinermik akiuinermillu ingerlatsigatta. Ima akiortigaarput pinaveersaartillugulu, pisinnaasut tamatta peqataalluta. Pisortallumi innersuussutaat sumi tamaani malinneqarput.
Naalakkersuisunuku namminneq akisussaaffimmik tigusinissaat maanna tullinnguusorinartoq. Amigaatigaarput kingulliit pisut eqqarsaatigalugit iliuusissamik saqqummiussisoqarnissaa – nappaat tuniluuttoq taamak ilungersunartutut inissisimatillugu naammanngilaq akisussaaffimmik allanut miloriussiinnarneq.
Nunarput ataatsimut isigalugu 64 procentit aappassaanik kapitissimapput, imaappoq 36 procentit suli naammattumik akiuussuserneqarsimanngillat. Nuummilu ullumikkut imaanaanngitsumik inissisimasoqarpoq.
Taamaattumik naalakkersuisut iliuusissamik erseqqinnerusumik saqqummiussaqarnissaat kissaatigaara. Tamanna sukkanerpaamik pisariaqarpoq. Qanitavut allallumi suli akiuussuserneqarsimanngitsut qanoq illersussanerivut paasissallugu tamatta pisariaqartipparput.
Nappaat piuvoq. Qanorlu iliussanerput sutigut tamatigut pinngitsoqarata ilisimassagutsigu Naalakkersuisut akisussaaffimmik tiguseqataassasut avaqqunneqarsinnaanngilaq. Tunniutiinnartoqassanngilaq.