Sermitsiaq.AG internetikkut saqqummersittagaani allaaserineqarpoq, Energy Transition Minerals Ltd (ETM) nunatsinni tikeraarnermini ilaatigut partiit oqaloqatigisimagai, oqaloqatigiinnernullu taakkununnga Siumut peqataasimasoq. Taamaanngilarli.
All.: Vivian Motzfeldt, siulittaasup tullia siulleq, Siumut
Siumup erseqqissassavaa, partii oqaloqatigiinnernut tamakkununnga peqataasimanngimmat, aamma ETM-ip avammut nalunaarutaa kukkuneqarmat, tamannalu ETM-ip nammineq Siumumut uppernarsarsimammagu.
Siumut isumaqarpoq, ETM-imut tunngatillugu taarsiiffigitinniarluni suliaq aallartinniarneqarpaluttoq ima nunatsinnut imaanaanngitsigisoq, suliffeqarfik oqaloqatigineqassappat tamanna Naalakkersuisutigoorlugu ingerlanneqartussaasoq.
Siumut apeqquteqarmat, kina partii sinnerlugu peqataasimanersoq, ETM ima akissuteqarpoq:
“Qujanaq ETM-ip tamanut emailianut paasiniaagavit aamma qanittukkut ilisimatitsissuterput pillugu paatsuunganartoqarsimappat tamanna utoqqatsissutigaara. Qanittukkut Nuummiitilluta arlaat Siumumut attuumassutilik ataatsimeeqatigisimavarput, kisianni pineqartoq aqutsisunut ilaanngilaq. Avammut ilisimatitsissutitsinni Perthimi qullersaqarfitsinniit paatsuunganeq pilerpoq, aamma tamanna kukkussutigeqqinneqarnavianngilaq.”
Sermitsiaq.AG-p allaaserisaa uani nanineqarsinnaavoq: https://sermitsiaq.ag/kl/etm-ip-aqutsisuisa-kuannersuit-oqaluuseriniarlugu-nunarput-tikeraarpaat