Sermersuumi ineqarnermut suliamut tunngatillugu borgmesteriusimasoq maannalu borgmesteriusoq kommunalbestyrelse avaqqullugu sulisimanerat akuersaarneqarsinnaanngilaq inatsisitigullu tunngavissaqarani
All.: Peter Davidsen, kommunalbestyrelsimi ilaasortaq, Siumut
Maannakkut ineqarnermut suliamut tunngatillugu paasissutissaat naqitat tunngavigalugit takussutissalimmik ilisimavarput, Kommuneqarfik Sermersooq Naalakkersuisuniit ineqarnermut tunngatillugu paasissutissanik ujartuilluni allakkatigut siullerpaamik saaffiginnissimasoq 14. maj 2019, kiisalu taassuma kingorna arlaleriarluni saaffiginnittarsimallutik, ajoraluartumillu borgmesteriusup borgmesteriusimasullu kommunalbestyrelse tamanna pillugu ilisimatittarsimanngilaat.
Naalakkersuisut ineqarnermut tunngatillugu saaffiginninnerminni inatsit tunngavigisaat tassaavoq: Kommunit aqunneqarnerat pillugu Inatsisartut inatsisaat nr. 29, 17. november 2017-imeersoq
§ 47. Naalakkersuisut nakkutigissavaat kommunalbestyrelsit ingerlatsinerminni inatsimmi matumani malittarisassat malinneraat, aammalu pisortani maleruagassat atuuttut naapertorlugit ingerlatsinersut.
Sermersuummi ineqarnermut suliaq aallartinneqarsimavoq Naalakkersuisut 14. maj 2019 kommuneqarfik Sermersuumut ineqarnermut tunngasunik paassissutissanik ujartuillutik saaffiginnimmata aamma suliamut tassunga allat saaffiginnissutaasartut kommunalbestyrelsimut saqqummiunneqanngillat ilisimatitsissutigineqaratilluunniit.
Kommunerfik Sermersooq Naalakkersuisuniit peqquneqarpoq inissianik attartukkanik attartortitsisarneq unitsinneqassasoq 12. februar 2020 tunngavigalugu, Kommunit aqunneqarnerat pillugu Inatsisartut inatsisaat nr. 29, 17. november 2017-imeersoq. § 49. Naalakkersuisut aalajangissavaat naammattumik tunngavissaqarnersoq suliap Nakkutilliisoqarfimmut ingerlateqqinnissaanut.
Sermersuummi ineqarnermut suliaq pillugu aatsaat kommunalbestyrelsip immikkut ittumik matoqqasumik ataatsimiinnerani 5. marts 2020-mi siullerpaamik kommunalbestyrelsimut saqqummiunneqarpoq.
Suliap aallartinneraniit qaammatit qulit qaangiuttullu aatsaat kommunalbestyrelsimut saqqummiunneqarpoq, naak aallaqqaammulli suliaq kommunalbestyrelsip tamarmiusup akisussaaffigigaluaraa borgmesteriusimasup maannalu borgmesteriusup pisinnaatitaaffitsik avaqqullugu isertuussisimapput, tassami Naalakkersuisut saaffiginnissutaat § 47. Naalakkersuisut nakkutigissavaat kommunalbestyrelsit ingerlatsinerminni inatsimmi matumani malittarisassat malinneraat, aammalu pisortani maleruagassat atuuttut naapertorlugit ingerlatsinersut. Una inatsit tunngavigalugu kommunalbestyrelsip ingerlatsineranut susassaqarfii pineqarmata borgmesterit pisussaaffeqarput periarfissaq siulleq atorlugu kommunalbestyrelse tamarmiusoq ilisimatissallugu akisussaaqataammata.
Sermersuumi ineqarnermut suliap aallartinneraniit ingerlaarnera naatsumik imaappoq.
14. maj 2019, Naalakkersuisut inissiat attartukkat attartorteqqittarnerat pillugu paasissutissanik ujartuillutik Kommuneqarfik Sermersooq allaffigisimavaat.
20. maj 2019, Aningaasaqarnermut Inuussutissalerinermut Ataatsimiitsitaliap ataatsimiinnerani Naalakkersuisut saaffiginnissutaat ilisimatitsissutigineqanngilaq.
11. juni 2019, Kommunalbestyrelsip ataatsimiinnerani Naalakkersuisut saaffiginnissutaat ilisimatitsissutigineqanngilaq.
11. juli 2019, Naalakkersuisut inissiat attartukkat attartorteqqittarnerat pillugu paasissutissanik ujartuillutik Kommuneqarfik Sermersooq saaffiginneqqipput.
19. august 2019, Aningaasaqarnermut Inuussutissalerinermut Ataatsimiitsitaliap ataatsimiinnerani Naalakkersuisut saaffiginneqqinnerat ilisimatitsissutigineqanngilaq.
27. august 2019, Kommunalbestyrelsip ataatsimiinnerani Naalakkersuisut saaffiginneqqinnerat ilisimatitsissutigineqanngilaq.
13. december 2019, Kammeradvokatip takisuumik nassuiaataa (udredning omkring kommunal langtidsleje af udlejningsboliger) naammassineqarpoq, Kommuneqarfik Sermersuumut ingerlateqqinneqarluni.
17. december 2019, Kommunalbestyrelsip ataatsimiinnerani kammeradvokatip takisuumik nassuiataa pillugu kommunalbestyrelse ilisimatinneqanngilaq.
Kammeradvokatip takisuumik nassuiaataata saqqummereernerata kingorna inatsisilerituunut allanut nalilersortinneqarsimavoq aningaasarpassuarnik nalilimmik aamma kommunalbestyrelse ilisimatinneqanngilaq tassunga tunngatillugu.
10. februar 2020, Naalakkersuisut inissiat attartukkat attartorteqqittarnerat paasissutissat aalajangersimasut 13-it Kommuneqarfik Sermersooq piumallugit saaffiginnissutigaat.
12. februar 2020, Naalakkersuisuniit Kommuneqarfik Sermersooq peqquneqarpoq (påbud) inissianik attartukkanik attartortitsisarneq unitsinneqassasoq.
20. februar 2020, Aningaasaqarnermut Inuussutissarsiornermullu Ataatsimiititaliap ataatsimiinnerani qulaani pineqartut ilisimatitsissutigineqanngillat.
05. marts 2020, Kommunalbestyrelsip immikkut ittumik ataatsimiinnerani siullerpaamik inissiat pillugit suliaq kommunalbestyrelsimut saqqummiunneqarpoq.
Inissianut tunngatillugu suliaq kommunalbestyrelsip tamarmiusup akisussaaffigimmagu borgmesteriusimasup maannakkullu borgmesteriusup inatsisitigut tunngavissaqanngitsumik kommunalbestyrelsimik avaqqutsillutik sulisimanerat kisermaassineruvoq, tamat oqartussaaqataanerannik tunngaveqarluni aqutsinermut aamma Kommunit aqunneqarnerat pillugu inatsimmut, kommunalfuldmagtimullu ataqqinninnginneruvoq akuerineqarsinnaanngitsoq.
Kommunalbestyrelsimut suliap isertuussisutut pissusilersorluni ingerlanneqarsimanerata saniatigut Nakkutilliisoqarfiup paasissutissanik tunngaveqarluni 9. november 2021 naliliinera tunngavigalugu borgmesterit politikikkut akuerineqanngitsunik atsiortarsimanerat tusagassiuutitigut sammineqareermata uterfigissanngilakka. Taamaattorli Kommuneqarfik Sermersuup kissaataa malillugu Nakkutilliisoqarfimmit sukumiinerusumik oqaaseqaammi atuarneqarsinnaavoq, Nakkutilliisoqarfiup paasissutissanik inatsisinik tunngaveqarluni ujartuinerani § 48. Kommunalbestyrelsip isumagissavaa Naalakkersuisunullu nalunaarutigalugu kommunimut tunngatillugu paasissutissat Naalakkersuisut piumasaasa ingerlatinneqartarnissaat. Kommunimut pulaarnerani 17. september 2021 aamma 13. oktober 2021 kommune allaffissornikkut suleqatigiuminaassimanera eqqaaneqarpoq.
Kommunip aqunneqarneranut akisussaaqataasutut ilisimanngisatsinnik ingerlatsisoqarsimanera akueriinnarneqarsinnaanngilaq akisussaasunngortinneqarsinnaagattami, tamannalu annertuumik kommunalbestyrelsimi ilaasortanut pakasaaneruvoq.
Naggataagut borgmesterit kommunalbestyrelsimik avaqqutsillutik suleriaaseqarsimanerat kommunalbestyrelsimi ilaasortanut tatiginninnginnertut nalilertariaqarpoq. Tamannarpiarlu tunngavigalugu kommunalbestyrelse inatsisinik tunngaveqarluni suleriaaseqassappat illersorneqarlunilu borgmesteri borgmesteriusimasorlu imminut tatiginassusiiarput, tamat oqartussaaqataanerannut inatsisinik tunngaveqarluni aqutsinissamut.