Aatsaat taamak suleqatigiinnissaq ikioqatigiinnissarlu kiisalu ersarissumik siunnerfilimmillu siuttoqarnissaq pingaaruteqartigaaq. Nualluummi ikioqatigiikkutta ajugaaffigisinnaagatsigu -siulersorluarneqarnikkut
All.: Erik Jensen, siulittaasoq, Siumut
Tamannalu inuiaqatigiit ujartoraat tupinnanngilaq. Siuttut toqqissisimanermik pilersitsisussaaniaraluit akisussaaffitsik sapangissimasartik allanut ingerlateqattaaginnaraat Siumumit allanngueqataaffigerusullugu akisussaaffimmik tigusilluta aaqqeeqataarusuppugut, tusaaneqartariaqarpugulli.
Erngerluni imminut misissuutissat, kviktestit, nunatsinnut 700.000-t missaat tikisinneqalersut paasisimalerparput. Tamatuma ersersippaa, tuniluunneq qanoq annertutigalunilu inuiaqatigiinni ingerlaalersimanersoq. Naalakkersuisullu marlunngornermi januaarip sisamaanni tusagassiuutinik katersortitsinerminni neriorsuipput, misissuutit tamakku sinerissamut siammarneqarnissaat pilersaarutaasoq, naak maannamut ersarilluinnartumik taamak pilersaaruteqarsimanertik qanoq iliussanerlugu oqaatigisinnaanngikkaluarlugu. Kommunillu qaninnertut iliuuseqartussat ikiuukkumallutik assammik isaassigaluarnerat Naalakkersuisut tusaajumanngitsutut ippaat.
Tunniutiinnarsimasutut pissusilersorneq
Coronap sukkasuumik tuniluunnera aqunneqarsinnaanngilaq, Naalakkersuisut namminneq siuttutut erseqqilluinnartunik pilersaarusiukkanillu iliuusissatut piareersimasuuteqanngippata. Killiffillu taamak ittoq maanna nalaasimagipput Siumut isumaqarpoq. – Naalakkersuisut nappaammut tunillaassuunnermullu tunniutiinnarsimasutut pissusilersornerat inuiaqatigiillu siuttoqanngitsutullu inissisimalersimanerat erseqqissiartuinnarsimavoq.
Partiit Inatsisartuniitsitaqartut arlallit, Siumut ilanngulluni, maanna aalassassimaarput, Naalakkersuisunullu pineqartoq pillugu suleqateqarniaraluarneq siunertaqarunnaarsimasutut Siumup nalilerpaa. Iluaqutaanngivippormi tunillaasuunerup sakkortusiartorfiani Peqqinnissamut Naalakkersuisup corona pillugu partiinut ataatsimeeqataasartunut salluliorneraalluni atuagassaminnillu atuartarsimanngitsutut oqariartortalermat, naak pineqartoq pillugu partiit qanoq isumaqarneranik Naalakkersuisoq ujartuisussatut suliaqarniartussaagaluartoq.
Iliuutsit amigavipput tamannalu erseqqissivoq
Inuiaqatigiinni inissisimaffik ernumagalugu kommunit iliuuseqarnerusoqarnissamik qisuariartalernerat Siumup paasilluarsinnaavaa, soorlu Avannaata Kommunia taamaaliorsimasoq. Tamatumalu Naalakkersuisunit suli erseqqissumik qisuariarfigineqarsimannginnera assut tupinnarlunilu paasiuminaappoq, tassami kommunit qanimut suleqatigalugit ingerlatsinissaq pisariaqartoq kialluunniit apeqqusersorlugu pisinnaanngikkaluarpaa. Inuiaqatigiinni imaannaanngitsumik inissisimavugut, kommunillu assannik isaassinerat pinngitsoorani tigulluarneqartussaavoq. Inuinuku pineqartut.
Naalakkersuisut ilumut siuttuunerminnik akisussaaffeqartumillu ingerlatsisinnaanerminnik takutitsinissaat ersiuteqartitsinissaallu maanna pisariaqarluinnalersimavoq. Siuttut erseqqissumik siunnerfeqarnerminnik iliuusissanillu piareersimasuutitaqarnerminnik innuttaasunut takutitsisussaapput. Maannaluunniit Naalakkersuisut suna anguniarneraat ersernerlulluinnarluni inissisimavoq. Tassami amerlasoorpassuulluta kiisa nalornileraluttuinnarpugut malittarisassat suut uatsinnut inuttut ataasikkaarluta atuunnersut. Siumumiillu ilisimaarilluinnarparput nammineq akisussaaffeqaratta aammalu nammineq ataasiakkaatut mianersornitsigut qanorlu iliuuseqarnitsigut peqqissuunissarput akisussaaffigigatsigu.
Atuarfiit aningaasatigullu annaasat
Taamak inissisimasoqartillugu Januaarimi sukanganerusumik atuarfinni ingerlatsinissaq piumasaqaataavoq. Meeqqat taakkuupput tunillaasuunermik angerlarsimaffinnut annertunerusumik eqqussuilertussaasut, taamallu pisoqarpat akisussaasut qanoq iliuuseqartoqarnissaanik akissutissaqartitserpalunngillat. Taamaapportaaq inuit sulinatik angerlarsimaffimminni uninngaannartariaqalersut, qanoq annaasaqannginnissaanik naalakkersuisut akissutissaqartitsinngillat. Siuttoqarnikkut innuttaasut pisariaqartitsinerat aatsaat taamak erseqqissuliorfigissallugu pisariaqartigileraluarpoq.
Ataqatigiissaakkamik misissortittarnissaq pisariaqavippoq
Misissortinniarlutik saaffiginnittut assigiimmik periarfissaqartinneqannginnerat qitiusumiit aqutsisinnaannginnermik ataqatigiissaarisinnaannginnermillu takutitsineruvoq. Sooruna kommunit neqeroorutaat tigujumaneqanngitsoq? Kommunit neqeroorutaat Naalakkersuisunit tiguneqartariaqalerput.
Paatsiveqanngilluinnartumillu Naalakkersuisut ingerlatsiniaraluarnerat ajoraluartumik tassunga killinngilaq. Maanna ilisimalerparput Inuussutissarsiornermut Naalakkersuisut peqqinnissaqarfik akisussaaffigalugu tigusimaleraa. Tamanna annertuumik siuttoqannginnermik ataqatigiinngitsoqarneranillu ersiutaavoq tamatsinnut ernumanarluinnartoq.
Naalakkersuisut imminnut pineqarsoriunnaarunik iluaqutaasaaq
Massakkorpiaq akisussaaffik tigullugu Naalakkersuisut pimoorussinerullutik sulisariaqalerput. Naalakkersuisut siulittaasuata akisussaaffigaa, akisussaaffinnik agguataarisimanini erseqqissumik oqaasertalerlugulu aqutsisinnaanermik takutitsinissani, Naalakkersuisut nammineq pinagit kisiannili innuttaasut pillugit.
Naggataatigut Siumumit annertuumik qutsavigerusuppagut peqqinnissaqarfimmi ilungersorlutik sulisorpassuit, kajumissutsiminnik ikiuuttut kommuninilu suleqataarusuttunut aammalu Peqqissutsimut Naalakkersuisoq peqqissilluarnissaanik kissaapparput.