All.: Vivian Motzfeldt, siulittaasup tullia siulleq
Nunatta oqaluttuarisaanerani ullumi tallimanngorneq septembarip qulingani eqqumiitsumik pisoqarpoq. Kommune Kujallermi kommunalbestyrelsi immikkut ittumik ataatsimiittariaqarsimavoq, Naalakkersuisut suliassartik suunersoq nalummassuk.
Naalakkersuisut Kujallermi qanoq mittarfiliornissap sammiveqartillugu suliarineqarnissaa nalornissutigaat, naak suliassaq Inatsisartunit akuersissutigineqareeraluartoq.
Taamaattumik eqqumiiginarpoq, Kujallermi innuttaasut annikinnerusumik pineqarnissaat maanna Naalakkersuisut sulissutigigaluttualermassuk. Naalakkersuisullu taakkorpiaat assinganik Ilulissani Nuummilu mittarfiliornerit apeqqusersunngilluinnarpaat, tassami taakku ilanngullutik Inatsisartunit suliakkiissutaareerput naammassisassat.
Naalakkersuisut Inuit Ataqatigiit aamma Naleraq, naalakkersuisutut pisussaaffitsik naammassisinnaanngikkunikku, Siumumit naatsorsuutigaarput Inatsisartuni oqaluuserisassanngortitsissasut. Pingaartumik Inatsisartut akuersissutigereersimasaat qanoq aningaasalersorneqarnissaa isumassaqartissimanngikkunikku.
Siumumit nuannaarutigaarput Kujallermi Siumut sinnerlugu kommunalbestyrelsimut ilaasortat Naalakkersuisut naammassisinnaanngisaanut utoqqatsissutissatut atorneqarumanatik takissusissaq aalajangiunneqarsimasoq 1.500 meteri aalajangiusimammassuk.