Siumup Inatsisartuni gruppiata siulittaasuata, Hans Peter Poulsenip, Inatsisartut upernaakkut ataatsimiinnerat naggaserlugu oqaaseqaataa.
Inuiaqatigiit ikiliartortuniilluta politikeritut pisussaaffitta ilaa naammassivarput.
Siumumit iluarisimaarparput ataatsimiinnerup ilusilernerani milisiutaasumik aaliangiiffigisassat oqallisissiallu akuleriinnerusumik inissinneqarnerat. Maluginiarparpulli suli pitsaanerulersinneqarsinnaasoq qularutiginngilarpulli siulittaasoqarfiup tamanna ilisimaarilluaraat.
Inatsisartut suleriaasiannik nutarterinissamik suliaqarluni ingerlatsisoqarnera qilanaaralugu Siumumit utaqqimaarparput, Nunatsinni tamat oqartussaaqataanerisa pitsanngorsarneqarnissaanit pisariaqarteqisatsinnik imaqartussaammat.
Eqqortumik toqqammaveqarluni inatsisiliornerup pingaassusia pineqarmat;
- Paasissutissat eqqortut
- Paasissutissat tamaasa,
atorlugit suliarineqarnissaat pingaaruteqarnerpaatut Siumumit isumaqarfigivarput.
Ippassaq eqqarsaat inersuarmi apeqqutigineqartumut… pitsaanerpaamik ujartuiuaannassaagut imaluunnit Kalaallit Nunaannut naleqquttumik aaqqissuussissaagut?
Soorngunami Kalaallit Nunaannut naleqquttoq aaqqissuussaq pitsaanerpaajuaannassaaq illuatungaa eqqumiippallaasaqaaq, Kalaallit Nunaannut naleqqussarneqarmat taava ajunngilaq pitsaanerpaanngikkaluaruni?
Suleriaatsilli pitsaanerpaat atuleraluarutsigilluunnit maluginiagassaavoq oqallittariaatsip ingerlanneqarnera torinngippat allannguiniarnerup (tassa tamat oqartussaaqataanerup nukittorsarnissaa) sapangissavarput, immitsinnut piumasaqanngikkutta nammineq pitsaanerulerumalluta iliuusitsinni takutikkutsigu. Oqallinnermi ajugaanissaq periarfissatuanngorsimappat oqalliseqatinik naleerutsitsineq imaluunnit naleerunnerulersitseqqaarluni isummertarneq – taallugulu tassa politiki – tassunga pisimagutta mianersorfissatsinniilereersimavugut, uagut ullumikkut akisuussaaffimmik tigummiaqartuusugut qinersisartunik qinerneqarsimanerput aallaavigalugu taamatut piumasaqaateqarsorilersimagutsigu.
Qinersineq taamatut piginnaatitsisutut atorneqalersimappat, allat apparsarlugit oqalulluta pitsanngorsaassasugut – Siumumit tamanna peqataaffigerusunngilarput.
Amerlanerussuteqarluarnerup mianerisassartaa Siumumit eqqumaffigivarput; amerlanerussuteqarluarneq atorneqanngisaannassaaq siutigut matoriarlugit aalajangersaanermik. Killissaa tikillugu isumaqatigisinnaasat amerlanerpaat qulakkeeqqaarneqassapput, taamaattumillu oqaloqatigiinnermik ingerlatsisoqaqqaartariaqarpoq.
Politikissaagut Kalaallit Nunarput inuuffittut pitsanngorsarniarlugu, innuttaasut tamarmiusugut ineriartortinniarluta. Nunarput Namminersulersikkumallugu.
Ineriartornavianngilagut allannguinngikkutta, ilaqarpugulli ineriartornermik kissaateqaatigalutik allannguinissaminnik kissaateqanngitsunik. Tamanna aqqutissaanngitsutut isumaqarfigivarput, siunissami inuunermik allannguinissamik pitsanngorsaanissamillu suliaqartilluta tamatta unammillerneqartussaavugut, aamma ukunani suliani ingerlasuni;
- Aalisarneq pillugu inatsit
- Attassinnaanermut ineriartornermullu isumaqatigiissutissaq, iluaniilluni aamma akileraartarnermik akitsuusiisarnermilu aaqqissuusseqqinnerit
- Takornariaqarneq pillugu inatsisissaq.
Allallu siunnersuuterpassuit inatsisartuniit siunnersuutaasussat qilanaarivagut suleqataaffigissallugit.
Qujanaq upernaami ataatsimiinnermi naammassilersumi, suleqatigut Naalakkersuisut, Inatsisartut Kalaallit Nunatsinnilu innuttaasut ajunnginnerpaamik aasarsiorluarnissaanik kissaappagut.