Nunarput maannamut aatsitassarsiornermit iluanaaruteqarsimava? Nunatsinnut angusassaq pitsaanerpaasussaq anguniarlugu suleqatigiinniaritsi.
All.: Peter Davidsen, Sermersuummi kommunalbestyrelsimut ilaasortaq
Aallaqqaasiutigalugu assersuutigerusuppara, Qeqertarsuatsiaap eqqaani rubiniusiorfimmi 60 procentia piiarneqarsimalermat. Qanoq iluaqutaava aamma naleqarpa? Kiap rubini piiarneqartoq qanoq annertussuseqarnersoq nakkutigaa? Namminersorlutik Oqartussat, allaffimmiit? Maannamut Nunatta qanoq iluanaarutigivaa? Nalunaq qanoq nunatsinnut iluanaarutaava? Seqinnersuusaaq Atammiup eqqaaniittoq qanoq iluanaarutigaarput? il.il.
Maannakkut partiit saqittaatserujoorput aatsitassarsiorfinnut iluareqqusaarlutik iluanaarutaassammatagooq? Naak takussutissaq? Nunatta pissarsiaqarnerpaanissaa anguniarlugu politikikkut pitsaassusilimmik suleqatigiinniaritsi ikioqatigiillusilu. Qanoq aatsitassarsiornermi Nunarput inuilu iluanaartissaneraat pingaarnerpaavoq (Siumut, Demokraatit, IA, Naleraq, Atassut, il.il.) Qineqqusaaginnarluni saqitsaanneq sumut atussagami?
Suliassaq pingaarnerpaaq tassaasariaqarpoq nunatsinni aatsitassaq piiarneqartoq qanoq akoqassusia ilisimalissallugu, taannalu tunngavigalugu inatsit naleqqussassallugu, taamaaliornikkut aatsitassarsiortut procentimik aalajangersimasumik aningaasaateqarfinnut akiliuteqartarlutik aallarteqqullugit.
Imaanngitsoq aatsaat aatsitassarsiorfiit sinneqartoorunik nunatsinnut iluaqutaassasut. Sinneqartoornissaq piumasaqaataappat sinneqartoornavianngillat. Allatut oqaatigalugu, aatsitassaq inuiaqatigiinnut pissarsissutaassanngippat taava piiaaffigineqartariaqanngilaq.
Nuna tamakkerlugu politikerit qinnuigissavassi aatsitassanut inatsit sukateqqullugu, taamaaliornikkut nunatsinnut iluanaarutissanngorlugu. Aatsitassarsiortunut pitsaasaarnikkut inuiaqatigiit atugaat pitsaanerulersinnavianngilagut.
Piaartumik iliuuseqarniaritsi utaqqinasi.