Qinigaaffiup siuliani naalakkersuisooqatigiit anguniagaat suluusalinnut mittarfiit Qasigiannguani, Qeqertarsuarmi Kangaatsiamilu sanaartorneqarnissaannut pilersaarutit ingerlasimagaluarput. Siorna aningaasanut inatsimmi Qeqertarsuup Tunuani suluusalinnut mittarfiit Inuit Ataqatigiit Nalerarlu naalakkersuisooqatigiinnerisa nalaani peernikuuaat. Tamanna akuerisinnaanngilarput
All.: Aqqa Samuelsen, Qeqertalimmi kommunalbestyrelsimi Siumut gruppiani siulittaasoq
Massakkut ”taamaallaat” Tasiilami aamma Ittoqqortoormiuni suluusalinnut mittarfiliornissamut pilersaarutit ingerlanneqarput, Qeqertarsuup Tunuani suluusalinnut mittarfiit aningaasanut inatsimmi aallerfigineqarlutik unitsiinnarneqartut. Tamanna akuerisinnaanngilarput. Qeqertarsuup Tunuani suluusalinnut mittarfiit unitsiinnarneqassanngillat.
Kommunip iluani angallannikkut atortulersuutitigut pitsanngorsaasoqarnissaa Kommune Qeqertalimmi kommunalbestyrelsimi sulinitsinni Siumut gruppiata pingaartitaasa ilagivaat. Qasigiannguani, Qeqertarsuarmi, Kangaatsiamilu suluusalinnut mittarfinnik pilersitsisoqarnissaa Naalakkersuisut Inatsisartullu suleqatigalugit anguniarusupparput.
Taamaalilluni angallannermi atoruminarnerusumik suluusalinnut mittarfeqalerutta nunatsinni innuttaasunut aammalu takornarianut kommunerput tikikkuminarnerulissaaq. Ilulissani Nuummilu mittarfissuit sanaartorneqarnerannut atatillugu nuna tamakkerlugu angallannikkut ataqatigiinnerusumik siammasinnerusumillu periarfissanik aaqqiisoqarnissaa pisariaqarpoq.
Taamaammat maannakkut naalakkersuisooqatigiit atuuttut aammalu Inatsisartunut ilaasortat pisussaaffilerusuppagut Qeqertarsuup Tunuani suluusalinnut mittarfiit piviusunngortinneqarnissaat piviusorsiortumik sulissutigeqqullugu.