Anders Olsen, Inatsisartunut ilaasortaq
Inatsisartut suleriaasianni § 37 imm. 1 naappertorlugu Naalakkersuisunut apeqqutit imaattut matumuuna saqqummiuppakka:
Naalakkersuisunut apeqqutit:
- Ukioq 2000-imiit 2010 tikillugu politeeqarfinni tamani aalajangersimasumik politiitut atorfeqartut kisitsisinngorlugit qanoq isikkoqarpat (illoqarfikkaartumik)?
- Ukioq 2010-miit 2020 ilanngullugu politeeqarfinni tamani aalajangersimasumik politiitut atorfeqartut kisitsisinngorlugit qanoq isikkoqarpat (illoqarfikkaartumik)
- Nunarput tamaat isigalugu politiitut atorfeqartinneqartut amerlassusaat qanoq ukiuni qulaani taaneqartuni inissisimava aammalu politiitut atorfiit amerlassutsikkut anguniakkat qanoq isikkoqarpat?
Tunngavilersuutit:
Nunatsinni politeeqarfiit inuttaqassutsikkut unamminartuni inissisimasartut ilisimaaraarput. Politiit sulinerat qinikkatut sulinitsinni paasisassarsiorfigisarnerini ilaatigut oqariartuut imaattarpoq politiit taamaallaat allaffimmi suliassanut angummassinnaasut angummanniarsarisullu. Tamanna ilumoortortaqarsimappat soorunami innuttaasut inatsisitigut illersugaanerat pitsaanerpaamiisimassanngitsoq takorloorneqarsinnaavoq, politiimmi aamma tassaammapata innuttaasut inatsisinik malitsitsinerat nakkutigissallugu, toqqissisimatitsinissaq qularnaassallugu kiisalu pinerluttaalisitsineq peqataaffigissallugu.
Apeqqutit akineqarnissaat ullut suliffiusut qulit iluini kissaatigaara.