Pinaveersaartitsineq katsorsaanerlu

Pinaveersaartitsineq nukittorsarneqassaaq — inuiaqatigiit peqqinnerusut qulakkeerumallugit.

Pinaveersaartitsineq aqqutigalugu inuiaat peqqinnarnerusumik inuuneqarnissaannut aqqutissiuussineq isumaginniffiit tamarmik suleqataaffigisaannik ingerlanneqassaaq. Pinaveersaartitsinermik suliaqarneq nukittorsarneqartuassaaq – qitiusumi najugaqarfinnilu ataasiakkaani. Suliniarnermi innuttaasut qitiutillugit suleqatigineqassapput.

Pinaveersaartitsineq pillugu Siunnersuisoqatigiit nuna tamakkerlugu atuuttut ataavartumik anguniakkanik periusissanillu naleqqussaallutik siunnersuusiortassapput, inuiaqatigiit naleqartitaat pingaartitaallu aallaavigalugit.

Ullumikkut inuusuttorpassuit naartuersittarput tamannalu inuttut naleqassutsimut annertuumik sunniuteqartarpoq peqqinnissaqarfinnullu annertoqisumik suliakkersuilluni. Pinaveersaartitsinerit inuusuttut ornittagaani klubini, timersoqatigiiffinni allanilu annertusarneqassapput.

Tupamik pujortartarneq akiorniarlugu siusissukkut pinaveersaartitsineq ingerlanneqassaaq.

Imerajuttunut, ikiaroorajuttunut aningaasanoorajuttunullu pinngitsuuisinnaajunnaarsimasunut katsorsaanerit innuttaasunut periarfissiissutigineqassapput. Ilutigisaanik katsorsaariaatsit tulluartuunersut nalilersoqqinneqartassapput, periutsit allat aamma periarfissiissutiginissaat ammaffigalugu, soorlu Minnesota.

Najugarisami sunngiffimmi sammisassaqartitsinerit peqqinnartunik nuannersunillu imaqartikkumallugit innuttaasut namminneq peqataanissaat aqqutissiuutissavarput.

Isumaginninnermut ukiut tamaasa aningaasartuuterpassuaqartarneq eqqarsaatigalugu, pinaveersaartitsinermut aningaasaliissuteqarluartarnikkut siunnersuisarnerit pitsaanerulernerisigut, isumaginninnermut aningaasartuutaasartut apparsarneqassapput.