Nunat Avannarliit inuusuttaat naapittut

Nunat Avannarliit Inuusuttaat (Ungdommens Nordiske Råd) ukiumoortumik ataatsimiippoq ulluni 29. – 31. oktobari 2021 Københavnimi. Ataatsimiinnermi aallartitat aamma alaatsinaattut nunani avannarlerniit katillugit inuusuttut 80 missaanniittut peqataapput

All.: Amalie Bourup, Siumup Inuussuttunut Suleqatigiiffiani siulittaasoq

Ataatsimiinnermi qulequttat assigiinngitsut oqallisigineqarput. Aaliangiiffigisassatut siunnersuutit katillugit 38 qaqinneqarput kingornalu suleqatigiissitani oqallisigineqareerlutik inersuarmi taasissutigineqarlutik. Taakkunannga 31 akuersissutigineqarput kingornalu inaarutaasumik ataatsimoortillugit allaganngortinneqarlutik Nordisk Råd-imut ingerlateqqinneqarlutik.

Oqaluuserisat nunatsinnut pingaaruteqartut ilaatigut tassaapput nunat avannarliit akornanni issittoq pineqartillugu inuusuttut sunniuteqaqataanissaat peqataatinneqarnerunissaat ullumikkornit annertunerusariaqarneranik oqariartuuteqarneq. Issittumi eqqissisimaneq siunertaalluni attaveqatigiinneq nukittorsarneqassasoq isumaqatigiissutigineqarluni. Taamaalilluni inuusuttut politikikkut oqartussaaqataanerat inerisarneqarnissaa suliniutigineqarluni sutigut tamatigut peqataatinneqarnissaat kissaatigineqarluni suliniutiginiarneqalerpoq.

UNR Session 2021 – Folketinget, Danmark

Aammattaaq silaannaap kissatsikkiartornerata kingunerisaanik sermersuup aakkiartornera nunani avannarlerni suleqatitsinniit isiginiarneqarpoq. Qulequttap taassuma iluani nunatsinni pisuussutinik uumaattunik peqassuseqaratarsinnaanera isiginiarneqarpoq siunissamilu periarfissatut isigineqartut eqqartorneqarlutik. Peqassutsip misissornissaani aatsitassanut qaqutigoortunut misissuinerit ukkanneqarnerussasut siunnersuutigivarput. Tassani ilanngullugu oqariartuutigisarput tassaavoq pinngortitamut peqqissutsimullu innarliinnginnissamik pingaartitsinissaq. Taamaattumillu aatsitassat qaqutigoortut pillugit peqassutsimik misissuinerup ukkanneqarnissaasa saniatigut nukissiuutit ataavartut pillugit sulineq annertusarneqassasoq siunnersuutitut tapertaliunneqarluni. 

Siunnersuutit ilaanniipportaaq Saamit Inuillu oqaasii kulturiat kinaassusaallu pillugit atuarfeqarfinni ilinniartitsinermi sammineqarnerunissaat. Isumaqaratta kinaassutsitsinnik oqaluttuarisaanitsinnik ilisarisimaqatigiinnerulerutta immikkoortitsisarnerit paattooqatigiittarnerillu pinngitsoortinneqarnerusinnaasut. Taamaalilluni isumaqatigiissutigineqarpoq kinaassutsitsinnik kulturitsinnik oqaluttuarisaanitsinnillu atuartitsinerit atuarfeqarfinnut eqqunneqarnissaat suliniutigineqassasoq.

Sisamanngorneq 28.10 aallarnerfigalugu ulluni marlunni isumasioqatigiinneq ingerlanneqarpoq piujuaannartitsineq qulequtarineqarluni. Ataatsimiinnertavialu 29.-31. oktober ingerlanneqarluni. Ataatsimiinnermi UNR nutaamik siulittaasortaarpoq tassani Socialdemokratit Kattuffia sinnerlugu aallartitaq Rasmus Emborg amerlanerussuteqartunit taaneqarluni qinigaalluni.

Tallimanngorneq unnukkuani UNR ukiuni 50-inngortorsiornera nalliuttorsiutigineqarpoq oqallinnertalimmik.